ກົມສົ່ງເສີມ ແລະ ພັດທະນາສິນຄ້າ, ກະຊວງອຸດສາຫະກຳ ແລະ ການຄ້າ (ກະຊວງ ອຄ) ຮ່ວມກັບກົມສົ່ງເສີມການຄ້າລະຫວ່າງປະເທດ, ກະຊວງພານິດ ແຫ່ງຣາຊະອານາຈັກໄທ ໄດ້ເປີດງານວາງສະແດງສິນຄ້າລາວ-ໄທ ປະຈຳປີ 2014 ພາຍໃຕ້ຫົວຂໍ້ Lao-Thai trade Exhibition/Thailand Week 2014 ໃນລະຫວ່າງວັນທີ 30 ກໍລະກົດ-3 ສິງຫາ 2014 ຂຶ້ນທີ່ ສູນການຄ້າລາວ-ໄອເຕັກ ນະຄອນຫຼວງວຽງຈັນ ເພື່ອສ້າງໂອກາດດ້ານການຄ້າ ແລະ ສ້າງພາບລັກລະຫວ່າງຜູ້ຊື້-ຜູ້ຂາຍ ໂດຍມີຜູ້ປະກອບການລາວ-ໄທ ເຂົ້າຮ່ວມ 213 ບໍລິສັດ ມີຈຳນວນຫ້ອງວາງສະແດງທັງໝົດ 254 ຫ້ອງ. ພ້ອມກັນນັ້ນຍັງມີກອງປະຊຸມສຳມະນາດ້ານວິຊາການ ແລະ ການເຈລະຈາຈັບຄູ່ທຸລະກິດ ລາວ-ໄທ ຄາດງານດັ່ງກ່າວຈະສ້າງມູນຄ່າຊື້-ຂາຍຫຼາຍເຖິງ 6 ຕື້ກີບ ຫຼື ຫຼາຍກວ່າ 25 ລ້ານບາດ (ສະກຸນເງິນໄທ).
ການຈັດງານວາງສະແດງສິນຄ້າຄັ້ງນີ້ເພື່ອສືບຕໍ່ເສີມສ້າງການ ຮ່ວມມືລະຫວ່າງການຄ້າລາວ-ໄທ ໂດຍສະເພາະບັນດາແຂວງທີ່ມີຊາຍແດນຕິດຈອດກັນ. ນອກນັ້ນກໍ່ຍັງເປັນການຕອບໂຈດດ້ານການສຶກສາຂອງລາວໄດ້ເປັນຢ່າງດີໃນການນຳຜະລິດຕະພັນ ແລະ ອຸປະກອນການສຶກສາເຂົ້າມາວາງຈຳໜ່າຍພາຍໃນງານກ່ອນຈະເປີດສົກຮຽນໃໝ່ໃນເດືອນກັນຍາທີ່ຈະມາເຖິງນີ້.
ພ້ອມດຽວກັນນັ້ນ ກິດຈະກຳຄັ້ງນີ້ກໍ່ຈະໄດ້ມີສ່ວນສົ່ງເສີມ ແລະ ສະໜັບສະໜູນໃຫ້ເກີດການຮ່ວມມືທາງດ້ານເສດຖະກິດ ແລະ ການຄ້າລະຫວ່າງ ສປປ ລາວກັບໄທ ໃຫ້ມີຄວາມແໜ້ນແຟ້ນບົນພື້ນຖານຄວາມເທົ່າທຽມ, ມີຄວາມຈິງໃຈ ແລະ ນຳໄປສູ່ຄວາມເຊື່ອຖື ເຊື່ອໝັ້ນເຊິງກັນ ແລະ ກັນ.
ໃນງານວາງສະແດງຄັ້ງນີ້ຜູ້ປະກອບການຂອງລາວຈະນຳສິນຄ້າເຂົ້າມາວາງສະແດງເຖິງ 50 ຫ້ອງ, ມີ 50 ບໍລິສັດ ສິນຄ້າສ່ວນໃຫຍ່ແມ່ນຜະລິດຕະພັນອຸປະໂພກ ແລະ ບໍລິໂພກເປັນຕົ້ນແມ່ນ: ຫັດຖະກຳຜ້າໄໝ, ຜ້າຝ້າຍ, ໄມ້ແກະສະຫຼັກ, ເຟີນິເຈີ, ສິນຄ້າໂອດ໋ອບ, ອາຫານ ແລະ ເຄື່ອງດື່ມ.
ທ່ານ ນາງ ພິມົນ ປົງກອງແກ້ວ ອັກຄະຣາຊະທູດທີ່ປຶກສາຝ່າຍພານິດໄທປະຈຳລາວ ກ່າວວ່າ: ພາຍໃນງານຜູ້ປະກອບການຈາກໄທ ຈະນຳສິນຄ້າມາວາງສະແດງຫຼາຍເຖິງ 254 ຫ້ອງ, ມີ 204 ບໍລິສັດຈະມີສິນຄ້າຫຼາກຫຼາຍຊະນິດເປັນຕົ້ນແມ່ນ: ອຸປະກອນການສຶກສາ, ອາໄຫຼ່ລົດ, ອຸປະກອນກໍ່ສ້າງ, ເຄື່ອງໃຊ້ໄຟຟ້າ, ຜະລິດຕະພັນອາຫານ ແລະ ເຄື່ອງດື່ມ, ເສື້ອຜ້າແຟຊັນ, ເຄື່ອງປະດັບ, ເຄື່ອງຕົບແຕ່ງພາຍໃນເຮືອນ, ເຄື່ອງສຳອາງບຳລຸງຜິວ, ເຄື່ອງໃຊ້ໃນຄົວເຮືອນ ແລະ ຜະລິດຕະພັນອື່ນໆອີກ.
ນອກນັ້ນ ພິເສດພາຍໃນງານຍັງມີການເຈລະຈາທຸລະກິດລາວ-ໄທ ໃນນັ້ນມີຈຳນວນທຸລະກິດຈາກໄທ 80 ບໍລິສັດ ແລະ ທຸລະກິດຈາກລາວ 80 ບໍລິສັດ ສິນຄ້າທີ່ເຂົ້າຮ່ວມເຈລະຈາປະກອບມີ ເຄື່ອງມືການກະເສດ, ອາໄຫຼ່ລົດ, ອຸປະກອນກໍ່ສ້າງ, ອຸປະກອນການສຶກສາ, ເຄື່ອງໃຊ້ໄຟຟ້າ, ເຄື່ອງປະດັບ, ອາຫານ ແລະ ເຄື່ອງດື່ມ ແລະ ອຸດສາຫະກຳຕັດຫຍິບ. ຜູ້ປະກອບການທ່ານໃດທີ່ຕ້ອງການນຳຜະລິດຕະພັນເຂົ້າສູ່ຕະຫຼາດສາມາດເຂົ້າຮ່ວມການເຈລະຈາທຸລະກິດເພື່ອຫາຕົວແທນຈຳໜ່າຍໄດ້ຈາກການຈັດງານຄັ້ງນີ້ ຜະລິດຕະພັນທີ່ນຳມາວາງສະແດງໃນງານຄັ້ງນີ້ສ່ວນໜຶ່ງໄດ້ມີວາງຈຳໜ່າຍໃນລາວມາແລ້ວເພື່ອນຳມາຮ່ວມກິດຈະກຳສົ່ງເສີມການຂາຍໂດຍຈະສະເໜີຂາຍໃນລາຄາໂຮງງານ ເພື່ອກະຕຸ້ນຜູ້ບໍລິໂພກ ແລະ ສ່ວນໜຶ່ງຈະນຳຜະລິດຕະພັນໃໝ່ເຂົ້າມາວາງສະແດງເພື່ອເຈາະຕະຫຼາດໃນລາວ.
ນອກຈາກນີ້, ງານວາງສະແດງຍັງມີກິດຈະກຳຫຼາຍຢ່າງເຊັ່ນ: ການຝຶກອົບຮົມໄລຍະສັ້ນ, ການແລກປ່ຽນ ວັດທະນະທຳ, ການຝຶກອາຊີບເຄື່ອນທີ່, ການແນະນຳທຸລະກິດໃໝ່ເປັນຕົ້ນແມ່ນ ທຸລະກິດເຄື່ອງດື່ມ, ການບໍລິການນວດໜ້າ, ເສີມຄວາມງາມ ແລະ ສະແດງສິລະປະລາວ-ໄທ.
ດ້ານນັກທຸລະກິດໄທ ສະເໜີພາກລັດເພີ່ມຈຳນວນການຈັດງານຂຶ້ນໃຫ້ໄດ້ຫຼາຍກວ່າ 2 ຄັ້ງຕໍ່ປີ ແລະ ຄາດຫວັງວ່າຈະມີຄູ່ຄ້າທີ່ເປັນນັກທຸລະກິດຄົນລາວເຂົ້າມາຮ່ວມມືປະກອບສັນຍາຊື້-ຂາຍນຳກັນຢ່າງຕໍ່ເນື່ອງຫຼາຍກວ່າທີ່ຈະມາຊື້-ຂາຍຍ່ອຍໃນງານແບບນີ້.
ພິທີເປີດງານວາງສະແດງສິນຄ້າລາວ-ໄທ ປະຈຳປີ 2014 ຢ່າງເປັນທາງການໄດ້ຈັດຂຶ້ນຕອນແລງວານນີ້ ທີ່ສູນການຄ້າລາວ-ໄອເຕັກ ໂດຍການເຂົ້າຮ່ວມງານຂອງ ທ່ານ ສົມຫວັງ ນິນທະວົງ ຫົວໜ້າຫ້ອງການກະຊວງ ອຄ, ທ່ານ ສົມວັນດີ ນາຖາວົງສ໌ ຮອງເຈົ້າຄອງນະຄອນຫຼວງວຽງຈັນ, ທ່ານ ພິສະນຸ ຈັນທະວີທັນ ເອກອັກຄະຣາຊະທູດຣາຊະອານາຈັກໄທ ປະຈຳ ສປປ ລາວ, ທ່ານ ພັນ ວິໄລສົມ ຫົວໜ້າກົມສົ່ງເສີມ ແລະ ພັດທະນາສິນຄ້າ ກະຊວງ ອຄ, ທ່ານ ນາງ ພິມົນ ປົງກອງແກ້ວ ອັກຄະຣາຊະທູດທີ່ປຶກສາຝ່າຍພານິດໄທ ປະຈໍາລາວ ນອກນັ້ນຍັງມີຮອງຜູ້ວ່າການຈັງຫວັດຊາຍແດນ ໄທ-ລາວ, ຜູ້ບໍລີຫານຝ່າຍ ສປປ ລາວທູຕານຸທູດຕ່າງປະເທດ ແລະ ຜູ້ແທນອົງການນາໆຊາດປະຈຳ ສປປ ລາວ, ນັກທຸລະກິດ ລາວ-ໄທ ແລະ ແຂກທີ່ທ່ຽວຊົມຮ່ວມໃນພິທີເປີດງານດັ່ງກ່າວ.
