ໃນລະຫວ່າງດຳເນີນກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຊຸດທີ VII ມີປະຊາຊົນທັງພາຍໃນ ແລະ ຕ່າງປະເທດ ໃຫ້ຄວາມ ສົນໃຈໃນຫລາຍບັນຫາທີ່ກ່ຽວຂ້ອງກັບບັນດາກະຊວງຕ່າງໆ ເຊິ່ງໄດ້ສົ່ງຄວາມຄິດເຫັນຜ່ານໂທລະສັບສາຍດ່ວນ ຂອງກອງປະຊຸມດັ່ງກ່າວ ໂດຍສະ ເພາະໃນມື້ສຸດທ້າຍຂອງກອງປະຊຸມ ວັນທີ 25 ເດືອນກໍລະກົດ ປີ 2014 ທ່ານ ບຸນມີ ມະນີວົງ
ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ໄດ້ຕາງໜ້າໃຫ້ກະຊວງດັ່ງກ່າວຊີ້ແຈງ ແລະ ແກ້ຂໍ້ຂ້ອງໃຈ ຂອງປະຊາຊົນ ກ່ຽວກັບບັນຫາຢາງພາລາຢູ່ແຂວງຫລວງນ້ຳທາ ຕົກຕ່ຳມີຜົນ ກະທົບຕໍ່ການຜະລິດ ແລະ ລາຍຮັບ.ຕໍ່ກັບບັນຫາດັ່ງກ່າວ ທ່ານ ບຸນມີ ມະນີວົງ ຊີ້ແຈງວ່າ: ສາເຫດຂອງຢາງພາລາຕົກຕ່ຳໃນໄລຍະນີ້ ເກີດຈາກການຜະລິດມີຫລາຍກວ່າຄວາມຕ້ອງການ ຂອງຕະຫລາດໂລກ ໂດຍສະເພາະແມ່ນການ ຜະລິດອຸດສາຫະກຳທີ່ໃຊ້ຜະລິດຕະພັນຢາງພາລາແມ່ນບໍ່ໄດ້ເພີ່ມຂຶ້ນຫລາຍ; ການຜະລິດຢູ່ບາງປະເທດ ມີປະລິມານເພີ່ມຂຶ້ນ ເຮັດໃຫ້ການນຳເຂົ້າຢາພາລາຂອງເອີຣົບໜ້ອຍລົງ; ຍ້ອນລັດຖະບານ ຈີນໃຫ້ໂກຕ້າຈຳກັດແກ່ບໍລິສັດຈີນ, ບໍລິສັດເອກະຊົນພາຍໃນ ແລະ ຜູ້ປະກອບການທຸລະກິດ ຂອງລາວເຮົາບໍ່ໄດ້ຮັບສິດ ແລະ ເຂົ້າເຖິງໂຮງງານແມ່; ຍ້ອນຄຸນນະພາບຂອງຢາງພາລາບໍ່ດີ, ບໍ່ໄດ້ຕາມລະດັບ ຄາດໝາຍທີ່ທາງໂຮງງານຕ້ອງການ; ບໍ່ເຂົ້າເປັນກຸ່ມ, ເຮັດຄົນດຽວ ເຮັດໃຫ້ການຕໍ່ລອງລາຄາກັບບໍລິສັດເກັບຊື້ໄດ້ຍາກ ຕໍ່ກັບບັນຫາດັ່ງກ່າວ ທາງ ພະແນກອຸດສາຫະກຳ ແລະ ການຄ້າແຂວງ ແລະ ເມືອງ ກໍໄດ້ເປັນເຈົ້າການໃນການຄຸ້ມຄອງ ໂດຍແຕ່ງຕັ້ງຄະນະຮັບຜິດຊອບຄຸ້ມຄອງການ ເກັບຊື້ຢາງພາລານຳປະຊາຊົນ ບົນພື້ນຖານການສ້າງກົດລະບຽບການຄຸ້ມຄອງຢາງພາລາ ພາຍໃນແຂວງ ໂດຍແມ່ນທ່ານເຈົ້າແຂວງເປັນຜູ້ເຊັນອະນຸມັດ; ອອກແຈ້ງການກຳນົດລາຄາເກັບຊື້ຢາງພາລາ ນຳປະຊາຊົນ ຂອງບັນດາບໍລິສັດ ກໍຄືໂຮງງານຜະລິດໃນທົ່ວແຂວງ ເປັນແຕ່ລະໄລຍະບົນພື້ນຖານການ ແຈ້ງຕົ້ນທຶນຂອງຢາງພາລາ ເຊິ່ງປັດຈຸບັນລາຄາເກັບຊື້ຢາງພາລາ ຂອງບັນດາບໍລິສັດພາຍໃນ ແຂວງສູງສຸດສະເລ່ຍປະມານ 6.700-7.000 ກີບ/ກິໂລ
ຄັດຈາກ www.na.gov.la
