ໃນວັນອັງຄານ, ວັນທີ 6 ພຶດສະພາ 2014 ເວລາ 10:15 ໂມງ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກໍາ ແລະ ການຄ້າ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ William Jackson, ຮອງຜູ້ຊ່ວຍຫົວໜ້າຫ້ອງການຜູ້ຕ່າງໜ້າຝ່າຍການຄ້າຂອງອາເມລິກາດ້ານສິດທິພິເສດ (Deputy Assistant U.S. Trade Representative for GSP and Chair of the GSP Subcommittee of the Trade Policy Staff Committee) ພ້ອມດ້ວຍຄະນະທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 2-6 ພຶດສະພາ 2014 ໂດຍການນໍາພາຂອງທ່ານ Daniel A.Clune ເອກອັກຄະລັດຖະທູດອາເມລິກາປະຈໍາລາວ.
ຈຸດປະສົງຂອງການມາຢ້ຽມຢາມຄັ້ງນີ້ແມ່ນ ເພື່ອສະແດງຄວາມຂອບໃຈຕໍ່ລັດຖະບານລາວ ກໍ່ຄື ກະຊວງອຸດສາຫະກຳ ແລະ ການຄ້າ (MOIC) ທີ່ໄດ້ໃຫ້ການຮ່ວມມືເປັນຢ່າງດີ ໃຫ້ແກ່ຄະນະຜູ້ແທນ ອາເມລິກາ ໃນການສຶກສານະໂຍບາຍດ້ານແຮງງານ IPR ແລະ ສິດທິແຮງງານຂອງ ສປປ ລາວ ພາຍຫຼັງກອງປະຊຸມພິຈາລະນາເປີດກວ້າງ ຫຼື Public Hearing ກ່ຽວກັບການຂໍສິດທິພິເສດຈາກອາເມລິກາຂອງລາວ ໃນວັນທີ 4 ມິຖຸນາ 2013 ທີ່ ວໍຊິງຕັນ, ສະຫະລັດອາເມລິກາ . ອັນນີ້ກໍ່ສືບເນື່ອງຈາກການເຂົ້າເປັນສະມາຊິກຂອງອົງການການຄ້າໂລກຂອງ ສ.ປ.ປລາວ ໃນເດືອນ ກຸມພາ 2013 ຈາກນັ້ນ, ໄດ້ເຮັດໜັງສືສະເໜີເຖິງຫ້ອງການຜູ້ຕາງໜ້າຝ່າຍການຄ້າຂອງອາເມລິກາ ເພື່ອຂໍສິດທິພິເສດໃນເດືອນພຶດສະພາ 2013.
ສອງຝ່າຍໄດ້ປຶກສາຫາລືກ່ຽວກັບການພົວພັນຮ່ວມມືດ້ານການຄ້າລະຫວ່າງລາວ ແລະ ສະຫະລັດອາເມລິກາ ໂດຍສະເພາະແມ່ນຄວາມຄືບໜ້າໃນການຂໍສິດທິພິເສດຈາກອາເມລິກາຂອງ ສປປ ລາວ ແລະ ຜົນການເດີນທາງມາເຮັດວຽກຢູ່ລາວ. ສອງຟ່າຍເຫັນດີໃຫ້ສືບຕໍ່ແລກປ່ຽນຂໍ້ມູນຂ່າວສານນໍາກັນກ່ຽວກັບບັນຫາ GSP ແລະ ບັນຫາການປັບປຸງມາດຕະຖານແຮງງານຢູ່ ສປປ ລາວ.
ນອກນັ້ນ, ຄະນະຜູ້ແທນດັ່ງກ່າວຍັງໄດ້ເຂົ້າພົບປະເຮັດວຽກກັບພາກສ່ວນກ່ຽວຂ້ອງຂອງລາວ-ສະພາແຫ່ງຊາດ, ກະຊວງແຮງງານ ແລະ ສະຫວັດດີການສັງຄົມ, ສູນກາງສະຫະພັນກໍາມະບານລາວ, ກະຊວງວິທະຍາສາດ ແລະ ເຕັກໂນໂລຊີ ແລະ ຢ້ຽມຢາມໂຮງງານອຸດສາຫະກໍາຕັດຫຍິບ.
