ໂຄງການສ້າງຄວາມເຂັ້ມແຂງດ້ານການຄ້າຂອງກາເຟລາວ, ພະແນກອຸດສາຫະກຳ ແລະ ການຄ້າແຂວງຈຳປາສັກ ຮ່ວມກັບ ກຸ່ມຜູ້ຜະລິດກາເຟ, ສະມາຄົມກາເຟລາວ ໄດ້ຈັດກອງປະຊຸມປຶກສາຫາລືເພື່ອຈັດຕັ້ງຄະນະເຮັດວຽກ ເພື່ອກະກຽມການຈົດທະບຽນແຫຼ່ງກຳເນີດຜະລິດຕະພັນ ກາເຟບໍລິເວນ.
ກອງປະຊຸມມີຂຶ້ນໃນອາທິດຜ່ານມາ ຢູ່ຫ້ອງປະຊຸມສະມາຄົມກາເຟລາວ ທີ່ແຂວງຈຳປາສັກ ໂດຍການເຂົ້າຮ່ວມຂອງ ທ່ານ ຄຳໝັ້ນ ພັນທະລາ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງຈຳປາສັກ, ທ່ານ ພູວຽງ ລາດຊະໂຍ ຮອງຫົວໜ້າພະແນກວິທະຍາສາດ-ເຕັກໂນໂລຊີແຂວງຈຳປາສັກ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຄຳໝັ້ນ ພັນທະລາ ກ່າວວ່າ: ໃນປັດຈຸບັນການພັດທະນາຂະແໜງການກາເຟນັບມື້ນັບມີການຂະຫຍາຍຕົວ ແລະ ປັບປຸງຮູບແບບການຜະລິດ ໂດຍສະເພາະວິຊາການຂອງໂຄງການໄດ້ປະສານສົມທົບກັບທຸກໆພາກສ່ວນທີ່ກ່ຽວຂ້ອງ ແລະ ໄດ້ຈັດກອງປະຊຸມປຶກສາຫາລືໃນການກະກຽມຈົດທະບຽນແຫຼ່ງກຳເນີດ (ກາເຟບໍລິເວນ).
ອີງໃສ່ຜົນການຈັດຕັ້ງປະຕິບັດວຽກງານຜ່ານມາ, ການສົ່ງເສີມການຜະລິດສິນຄ້າດ້ານກະສິກຳແມ່ນໜຶ່ງໃນ 4 ເປົ້າໝາຍໃຫຍ່ຂອງແຜນພັດທະນາຂະແໜງກະສິກຳ ແລະ ປ່າໄມ້.
ວຽກງານດັ່ງກວ່າສຸດທີ່ມີຄວາມໝາຍສຳຄັນເພາະມັນໝາຍເຖິງການປະກອບສ່ວນອັນໃຫຍ່ຫຼວງຕໍ່ເສດຖະກິດແຫ່ງຊາດ, ເປັນແຫຼ່ງສ້າງລາຍຮັບເງິນຕາ ກໍ່ຄືການສ້າງວຽກເຮັດງານທຳໃຫ້ແກ່ປະຊາຊົນບັນດາເຜົ່າ ເພື່ອກ້າວໄປເຖິງການຫຼຸດຜ່ອນຄວາມທຸກຈົນກໍ່ຄືການກ້າວອອກຈາກປະເທດດ້ອຍພັດທະນາໃນປີ 2020 ເຊິ່ງແມ່ນເປົ້າໝາຍຂອງລັດຖະບານລາວໄດ້ວາງໄວ້.
ທ່ານກ່າວຕື່ມວ່າ: ຢ່າງໃດກໍ່ຕາມເຖິງວ່າພວກເຮົາໄດ້ປະສົບຜົນສຳເລັດຈຳນວນໜຶ່ງໃນການສົ່ງເສີມການຜະລິດສິນຄ້າດ້ານກະສິກຳ ເພື່ອຮັບໃຊ້ການບໍລິໂພກພາຍໃນ ແລະ ການສົ່ງອອກເປັນຕົ້ນແມ່ນກາເຟ ແລະ ພືດອື່ນໆ ທີ່ມີທ່າກ້າວການຂະຫຍາຍຕົວດີພໍສົມຄວນ ແຕ່ພວກກໍ່ຍັງຜະເຊີນໜ້າກັບສິ່ງທີ່ທ້າທາຍຫຼາຍປະການບໍ່ວ່າທາງດ້ານປະລິມານ ແລະ ຄຸນນະພາບຈາກສິນຄ້າ, ການແຂ່ງຂັນຈາກພາຍນອກ, ການເໜັງຕີງຂອງລາຄາ, ການຈັດຕັ້ງກຳລັງການຜະລິດ, ການປຸງແຕ່ງຕະຫຼອດເຖິງນະໂຍບາຍທີ່ສອດຄ່ອງ ເພື່ອສ້າງສະພາບແວດລ້ອມການຜະລິດທີ່ແທດເໝາະກັບສະພາບຕົວຈິງຂອງປະເທດ, ສິ່ງທ້າທາຍເຫຼົ່ານີ້ແມ່ນຕ້ອງການຄວາມເປັນເອກະພາບສູງຈາກທຸກພາກສ່ວນທີ່ກ່ຽວຂ້ອງ ເພື່ອພ້ອມກັນແກ້ໄຂບັນຫາດັ່ງກ່າວ.
ທ່ານຍັງໄດ້ຮຽກຮ້ອງບັນດາຜູ້ແທນໃນກອງປະຊຸມຄົ້ນຄວ້າພິຈາລະນາແລກປ່ຽນຄຳຄິດເຫັນ ໂດຍອີງໃສ່ຈຸດປະສົງຂອງກອງປະຊຸມ, ດັ່ງທີ່ທ່ານຮູ້ແລ້ວວ່າໃນຍຸດທະສາດພັດທະນາກາເຟລາວແຕ່ນີ້ຮອດປີ 2020 ໄດ້ກຳນົດເອົາວຽກງານການປັບປຸງຄຸນນະພາບກາເຟ ແລະ ການໂຄສະນາກາເຟລາວຄຸນນະພາບສູ່ຕະຫຼາດສາກົນແມ່ນໜຶ່ງໃນ 6 ທິດທາງສຳຄັນຂອງຍຸດທະສາດ. ສະນັັ້ນ, ການສ້າງເຄື່ອງໝາຍຄຸນນະພາບ ແຫຼ່ງກຳເນີດ ຫຼື Geographical indication (GI) ແມ່ນໜຶ່ງໃນວຽກງານທີ່ຈະສ້າງໃຫ້ກາເຟລາວມີພາບພົດດ້ານຄຸນນະພາບໃນຕະຫຼາດໂລກ ແລະ ນຳມາເຊິ່ງມູນຄ່າເພີ່ມໃຫ້ແກ່ຂະແໜງກາເຟລາວ.
ການຢັ້ງຢືນຈາກພູມີສາດຂອງຜະລິດຕະພັນໃດໜຶ່ງ (GI) ແມ່ນມີຄວາມສຳຄັນຫຼາຍໃນການໂຄສະນາຄຸນນະພາບສິນຄ້າຂອງຜະລິດຕະພັນກາເຟ ເພື່ອໄດ້ມູນຄ່າເພີ່ມທີ່ສຳຄັນແກ່ທຸກພາກສ່ວນທີ່ມີສ່ວນຮ່ວມໃນຂົງເຂດດັ່ງກ່າວ, ຍ້ອນເຫັນໄດ້ຄວາມສຳຄັນດັ່ງກ່າວ, ຈຶ່ງຈຳເປັນຕ້ອງກຽມຄວາມພ້ອມໃນການຈົດທະບຽນຢັ້ງຢືນ (GI) ຂອງກາເຟລາວ (ກາເຟບໍລິເວນ) ໃນມໍ່ໆນີ້.
