ໃນວັນທີ 07 ພຶດສະພາ 2024, ຫ້ອງການ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມສຳມະນາ ໃນຫົວຂໍ້ ການສ້າງຄວາມຮັບຮູ້ກ່ຽວກັບການຮ່າງບັນດາສັນຍາ ແລະ ນິຕິກໍາຂັ້ນກະຊວງ ໃຫ້ແກ່ພະນັກງານຂະແໜງອຸດສາຫະກໍາ ແລະ ການຄ້າ ຂຶ້ນທີ່ໂຮງແຮມ ແລນມາກ ແມ່ຂອງ ຣີເວີຊາຍ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ນາງ ຄໍາພັດ ພູນສຸກ, ຮອງຫົວໜ້າຫ້ອງການກະຊວງ.
ຈຸດປະສົງກອງປະຊຸມສຳມະນາຄັ້ງນີ້ ເພື່ອປະກອບສ່ວນໃຫ້ແກ່ການແກ້ໄຂບັນດາສິ່ງທ້າທາຍ ເພື່ອຊຸກຍຸ້ການປະຕິບັດທິດຊີ້ນຳການຫັນໄປສູ່ການຄຸ້ມຄອງລັດດ້ວຍກົດໝາຍໃນຂະແໜງ ອຄ ໃຫ້ມີຄວາມຄືບໜ້າ ແລະ ບາດກ້າວທີ່ໜັ້ນທ່ຽງ ບັນລຸຕາມຄາດໝາຍທີ່ກຳນົດໄວ້. ພ້ອມທັງສ້າງຄວາມເຂັ້ມແຂງທາງດ້ານວິຊາການແນໃສ່ຍົກໃຫ້ເຫັນຄວາມໝາຍຄວາມສຳຄັນ ແລະ ສ້າງຄວາມຮັບຮູ້ກ່ຽວກັບຂັ້ນຕອນ ເຕັກນິກການ ໃນດ້ານການຮ່າງສັນຍາ ແລະ ນິຕິກໍາຂັ້ນກະຊວງ ໃຫ້ເຂົ້າໃຈເລິກເຊິ່ງ ແລະ ເປັນເອກະພາບກັນທາງດ້ານຫຼັກການ.
ກອງປະຊຸມ ໄດ້ມີການບັນລະຍາຍ ໂດຍ ວິທະຍາກອນ ຈາກ ກົມສົນທິສັນຍາ ແລະກົດໝາຍ, ກະຊວງການຕ່າງປະເທດ, ຫ້ອງການກະຊວງ ແລະ ກົມເຈລະຈາການຄ້າ ແລະ ຮ່ວມມືເສດຖະກິດສາກົນ ຂອງກະຊວງອຸດສາຫະກໍາ ແລະການຄ້າ ໃນຫົວຂໍ້ຕ່າງໆ ເປັນຕົ້ນ:
- ລາຍງານ ສະພາບການຮ່າງບັນດາສັນຍາ ແລະ ນິຕິກຳຂັ້ນກະຊວງ ຂອງຂະແໜງອຸດສາຫະກຳ ແລະ ການຄ້າ;
- ຂັ້ນຕອນ ແລະ ຫຼັກການ ການປະຕິບັດສົນທິສັນຍາ ແລະ ສັນຍາສາກົນ;
- ການຈັດຕັ້ງຜັນຂະຫຍາຍສົນທິສັນຍາການຄ້າ;
- ຫຼັກການ ການຮ່າງບົດບັນທຶກຄວາມເຂົ້າໃຈ (MOU) ແລະ ຫຼັກການ ການຮ່າງນິຕິກຳຂັ້ນກະຊວງ;
ໃນກອງປະຊຸມມີລັກສະນະວິຊາການ, ແລກປ່ຽນຄຳຄິດເຫັນ ແລະ ຕັ້ງຄຳຖາມ ເພື່ອແລກປ່ຽນຖອດບົດຮຽນກັນ ຊຶ່ງກອງປະຊຸມ ກໍໄດ້ຮັບຜົນສຳເລັດຕາມຄາດໝາຍທີ່ກຳນົດໄວ້ ແລະ ຫ້ອງການກະຊວງ ກໍເນັ້ນໜັກວ່າ ຈະສືບຕໍ່ສ້າງຄວາມເຂັ້ມແຂງໃຫ້ ພະນັກງານ ຂະແໜງ ອຄ ໃຫ້ຫລາຍຂຶ້ນ ເນື່ອງຈາກວຽກງານດັ່ງກ່າວ ເປັນເຄື່ອງມືອ້າງອີງທີ່ສຳ ຄັນໃນການຄຸ້ມຄອງວຽກງານຂະແໜງ ອຸດສາຫະກຳ ແລະ ການຄ້າ ດ້ວຍນິຕິກຳ ໃຫ້ມີປະສິດທິພາບ ແລະ ປະສິດທີຜົນສູງສຸດ ຕາມແຜນພັດທະນາອຸດສາຫະກຳປຸງແຕ່ງ ແລະ ການຄ້າ ທີ່ກຳນົດໄວ້ ໃຫ້ປະກົດຜົນເປັນຈິງເທື່ອລະກ້າວ.
ຂ່າວ-ພາບ: ພະແນກນິຕິກໍາ ຫ້ອງການ ກະຊວງ ອຄ.
