ໃນຕອນເຊົ້າ ວັນທີ 08 ເມສາ 2024 ທີ່ ໂຮງແຮມເມືອງແທັງ, ນະຄອນຫຼວງວຽງຈັນ ໄດ້ມີພິທີລົງນາມ ສັນຍາການຄ້າລະຫວ່າງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ນອກຈາກຈະມີພິທີລົງນາມດັ່ງກ່າວແລ້ວ ທັງສອງຝ່າຍກໍ່ຖືເວທີດັ່ງກ່າວເປັນເວທີພົບປະ ແລະ ປຶກສາຫາລື ກ່ຽວກັບການຈັດຕັ້ງປະຕິບັດແຜນການຮ່ວມມື ຂອງສອງລັດຖະບານ ສປປ ລາວ ແລະ ສສ ຫວຽດນາມ ປະຈຳປີ 2024 ວຽກງານຂະແໜງອຸດສາຫະກຳ ແລະ ການຄ້າ ຂອງທັງສອງປະເທດ ລາວ ແລະ ຫວຽດນາມ ໂດຍເປັນກຽດກ່າວຕ້ອນຮັບຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ລາວ ແລະ ການເຂົ້າຮ່ວມຄັ້ງນີ້ຂອງຝ່າຍຫວຽດນາມ ໂດຍແມ່ນທ່ານ ຫງວຽນ ຫົ່ງ ຢຽນ ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ພ້ອມຄະນະ ກະຊວງ ອຄ ຫວຽດນາມ ແລະ ຕາງໜ້າຈາກບັນດາກົມ ກະຊວງອຸດສາຫະກຳ ແລະ ການຄ້າ ກໍ່ເຂົ້າຮ່ວມ.
ເຊິ່ງການພົບປະ ດຳເນີນໄປດ້ວຍໄມຕິຈິດມິດຕະພາບ ແລະ ປຶກສາຫາລື ຢ່າງກົງໄປກົງມາ ເພື່ອພ້ອມກັນຊອກຫາວິທີ ແລະ ກົນໄກທີ່ເໝາະສົມ ໃນການຈັດຕັ້ງຜັນຂະຫຍາຍແຜນຮ່ວມມື ປະຈຳປີ 2024 ຊຶ່ງໄດ້ປຶກສາຫາລືກັນ ໃນ 6 ວຽກບູລິມະສິດ ແລະ ວຽກອື່ນໆ ດັ່ງນີ້:
1) ສອງກະຊວງອຸດສາຫະກຳ ແລະ ການຄ້າ ຂອງ ສປປ ລາວ ແລະ ສສ ຫວຽດນາມ ໄດ້ປຶກສາຫາລືກ່ຽວກັບການຈັດຕັ້ງຜັນຂະຫຍາຍ ເພື່ອບັນລຸເປົ້າໝາຍການເພີ້ມມູນຄ່າການຄ້າສອງຝ່າຍ ໃຫ້ບັນລຸ 10-15% ຕໍ່ປີ ທີ່ລັດຖະບານສອງ ປະເທດໄດ້ກຳນົດ ໃນນັ້ນ ເນັ້ນໃສ່ບັນດາກຸ່ມວຽກທີ່ເປັນບູລິມະສິດ ເປັນຕົ້ນ ວຽກງານການເຈລະຈາສັນຍາການຄ້າ, ການຄ້າຕ່າງປະເທດ, ການສົ່ງເສີມການຄ້າ ແລະ ການຜະລິດ ເພື່ອສົ່ງອອກ ພ້ອມທັງ ການອຳນວຍຄວາມສະດວກທາງດ້ານການຄ້າ, ການພົບປະ ແລະ ແລກປ່ຽນທັງພາກລັດ-ພາກທຸລະກິດ ແລະ ບັນດາແຜນງານຕ່າງໆ ເພື່ອໃຫ້ບັນລຸເປົ້າໝາຍທີ່ໄດ້ກຳນົດໄວ້.
2) ການເຈລະຈາທາງດ້ານການຄ້າ ແມ່ນໄດ້ປຶກສາຫາລືກ່ຽວກັບກົນໄກການປະສານງານ ເພື່ອຜັນຂະຫຍາຍສັນຍາການຄ້າ ລາວ-ຫວຽດນາມ (ສະບັບປັບປຸງ) ທີ່ໄດ້ລົງນາມໃນຕອນເຊົ້າ ຂອງວັນທີ 8 ເມສາ 2024 ແລະ ການປັບປຸງຂໍ້ຕົກລົງຮ່າໂນ້ຍ 2007 ວ່າດ້ວຍການສ້າງເງື່ອນໄຂຄົນ, ພາຫະນະ ແລະ ສິນຄ້າຜ່ານແດນ ເພື່ອໃຫ້ສາມາດຮອງຮັບສະພາບການປ່ຽນແປງໃຫມ່ ແລະ ທັນກັບສະພາບຄວາມເປັນຈິງ ໃນການເຄື່ອນໄຫວວຽກງານຂອງ ຂະແໜງ ອຸດສາຫະກຳ ແລະ ການຄ້າ ຂອງ ສປປ ລາວ ແລະ ສສ ຫວຽດນາມ. ນອກນີ້ຍັງໄດ້ ປຶກສາຫາລືກ່ຽວກັບ ການຈັດຕັ້ງຜັນຂະຫຍາຍ ບົດບັນທຶກຄວາມເຂົ້າໃຈກ່ຽວກັບການຄ້າຊາຍແດນ ແລະ ພື້ນຖານໂຄງລ່າງການຄ້າຊາບແດນ ລາວ-ຫວຽດນາມ ແລະ ບົດບັນທຶກກ່ຽວກັບການຕ້ານ ແລະ ສະກັດກັ້ນການຄ້າຂາຍນອກລະບົບ (ຄ້າຂາຍເຖື່ອນ) ຕາມຊາຍແດນ.
3) ໄດ້ປຶກສາຫາລື ກ່ຽວກັບການຄົ້ນຄວ້າເພື່ອທົດລອງສ້າງເຂດເສດຖະກິດ ແລະ ນິຄົມອຸດສາຫະກຳ ຢູ່ສະຖານທີ່ ທີ່ ເໝາະສົມ ໂດຍສະເພາະແຂວງທີ່ມີຊາຍແດນຕິດກັບ ສສ ຫວຽດນາມ ພ້ອມນີ້ ກໍ່ໄດ້ສະເໜີການສະໜັບສະໜູນທາງດ້ານວິຊາການ ແລະ ຊ່ຽວຊານ ຈາກ ສສ ຫວຽດນາມ ທີ່ມີຄວາມຊ່ຽວຊານ ແລະ ປະສົບການ ເພື່ອສຶກສາ ແລະ ຄົ້ນຄວ້າຄວາມເປັນໄປໄດ້ ຕ່າງໆ.
4) ໄດ້ປຶກສາຫາລື ກ່ຽວກັບການສຶກສາຄວາມເປັນໄປໄດ້ໃນການສ້າງໂຄງການຕົວແບບ ໃນຂົງເຂດອຸດສາຫະກຳປຸງແຕ່ງທີ່ມີທ່ານແຮງ ເຊິ່ງໄລຍະຜ່ານມາກໍ່ໄດ້ມີການປຶກສາ ກັບພາກທຸລະກິດ ເພື່ອຄົ້ນຄວ້າຄວາມເປັນໄປໄດ້ໃນການສ້າງບັນດາໂຄງການຕົວແບບດັ່ງກ່າວ ເຊິ່ງ ກະຊວງອຸດສາຫະກຳ ແລະ ການຄ້າ ຈະໄດ້ລົງເລິກຊ່ວຍກ່ຽວກັບນະໂຍບາຍສົ່ງເສີມ ແລະ ການປະຕິບັດຕາມການຕົກລົງໃນຂອບອາຊຽນ.
5) ໄດ້ປຶກສາຫາລື ກ່ຽວກັບການຄົ້ນຄວ້າເພື່ອກຳນົດຈຸດ ແລະ ສ້າງສາງນໍ້າມັນທີ່ເໝາະສົມ ຢູ່ ສປປ ລາວ ເພື່ອຮອງຮັບການນຳເຂົ້ານ້ຳມັນຈາກ ສສ ຫວຽດນາມ ເນື່ອງຈາກປະລິມານການນຳເຂົ້າໃນໄລຍະຜ່ານມາ ປະມານ 150-160 ລ້ານລິດ/ເດືອນ ຫລື ມີມູນຄ່າປະມານ 1,5-1,6 ຕື້ ໂດລາ/ປີ, ແຕ່ການນຳເຂົ້າຈາກ ສສ ຫວຽດນາມ ມີພຽງແຕ່ 10% ເທົ່ານັ້ນ. ຖ້າການນຳເຂົ້ານໍ້າມັນເຊື້ອໄຟຈາກ ສສ ຫວຽດນາມ ຂອງ ສປປ ລາວ ເພີ້ມຂື້ນ ກໍ່ຈະສົ່ງຜົນໃຫ້ມູນຄ່າການຄ້າ ສອງຝ່າຍເພີ້ມຂື້ນ ໃນຕໍ່ໜ້າ.
6) ໄດ້ປຶກສາຫາລື ກ່ຽວກັບການຮ່ວມມື ແລະ ພັດທະນາວຽກງານການຄ້າ ເອເລັກໂຕຼນິກ ເຊິ່ງເປັນວຽກງານທີ່ສຳຄັນໃນຍຸກເສດຖະກິດ ດີຈີຕອນ ເຊິ່ງເຫັນໄດ້ວ່າ ວຽກງານດັ່ງກ່າວແມ່ນສາມາດປະກອບສ່ວນປະມານ 25% ຂອງ ມູນຄ່າການຄ້າ ຫລື ມີມູນຄ່າປະມານ 18 ຕື້ ໂດລາ ຢູ່ ສສ ຫວຽດນາມ ໃນປີ 2023 ແລະ ຄາດວ່າ ປີ 2025 ຈະສາມາດບັນລຸໄດ້ 20 ຕື້ໂດລາ.
7) ກອງປະຊຸມໄດ້ເຫັນດີ ສະເໜີໃຫ້ມີການສ້າງຕັ້ງຄະນະເຮັດວຽກ, ຄະນະສະເພາະກິດ ແລະ ຄະນະປະສານງານຮ່ວມກັນ ລະຫວ່າງກະຊວງອຸດສາຫະກຳ ແລະ ການຄ້າ ຂອງ ສປປ ລາວ ແລະ ສສ ຫວຽດນາມ ເພື່ອຜັນຂະ ຫຍາຍໃນລວງເລິກ ໃນການຈັດຕັ້ງປະຕິບັດບັນດາສັນຍາ, ບົດບັນທຶກຄວາມເຂົ້າໃນ, ແຜນງານ ແລະ ກິດຈະກຳການຮ່ວມມື ໃຫ້ເປັນຮູບປະທຳ ແລະ ຮັບປະກັນເຖິງໝາກຜົນສຳເລັດ ໃນການຈັດຕັ້ງປະຕິບັດວຽກງານເຫຼົ້ານັ້ນ.
8) ກອງປະຊຸມໄດ້ເຫັນດີ ເພື່ອຊຸກຍູ້ໃຫ້ມີການເພື່ອເຜີຍແຜ່ບັນດາເນື້ອໃນຈິດໃຈຂອງສັນຍາການຄ້າ, ບົດບັນທຶກຄວາມເຂົ້າໃຈ ແລະ ນິຕິກຳອື່ນໆ ໃຫ້ບັນດາພາກລັດທັງສູນກາງ-ທ້ອງຖິ່ນ ແລະ ພາກທຸລິດ ເພື່ອໝູນໃຊ້ບັນດານິຕິກຳດັ່ງກ່າວໃຫ້ເກີດປະໂຫຍດສູງສຸດ ໃຫ້ແກ່ ລາວ ແລະ ຫວຽດນາມ.
ພາຍຫລັງສຳເລັດການພົບປະ ແລະ ປຶກສາຫາລື ເພື່ອຜັນຂະຫຍາຍແຜນການຮ່ວມມື ປະຈຳປີ 2024 ກໍ່ເປັນໂອກາດອັນສຳຄັນ ຂອງວາລະ ພິທີລົງນາມເຊັນສັນຍາ ແລະ ລົງນາມບົດບັນທຶກຄວາມເຂົ້າໃຈ ຊື່ງມີດັ່ງລຸ່ມນີ້:
1) ລົງນາມໃນສັນຍາການຄ້າ (ສະບັບປັບປຸງ)ລະຫວ່າງທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ລາວ ແລະ ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ.
2) ລົງນາມບົດບັນທຶກຄວາມເຂົ້າໃຈກ່ຽວກັບຄວາມສໍາຄັນໃນການຄຸ້ມຄອງລັດ ຕິດພັນກັບການຕ້ານ-ສະກັດກັ້ນ ພຶດຕິກຳການດຳເນີນທຸລະກິດ, ການຄ້າ ທີ່ລະເມີດກົດໝາຍ; ປົກປ້ອງສິດຜົນປະໂຫຍດຂອງຜູ້ຊົມໃຊ້ ແລະ ເພີ່ມທະວີການຮ່ວມມືໃນຂົງເຂດຄຸ້ມຄອງຕະຫຼາດ ຕິດພັນກັບວຽກງານກວດກາການຄ້າລະຫວ່າງ ກົມແຂ່ງຂັນທາງທຸລະກິດ ແລະ ກວດກາການຄ້າ ລາວ ແລະ ກົມໃຫຍ່ຄຸ້ມຄອງຕະຫລາດ ຫວຽດນາມ.
3) ລົງນາມບົດບັນທຶກຄວາມເຂົ້າໃຈ ລະຫວ່າງ ກຸ່ມບໍລິສັດພອນສັກ, ສະຖາບັນ NARIME ແລະ ບໍລິສັດ GP Holdings.
ພາບ: ໄພວັນ ໂຄດວັນທາ
ຂ່າວ: ເພັດປະກາຍ ສີສົມບູນ
