ໃນຕອນບ່າຍ ວັນທີ 18 ມີນາ 2024, ເວລາ 14:00 ໂມງ ທີ່ກະຊວງ ອຄ, ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ພົບປະ ທ່ານ Toshio NAGASE ຫົວໜ້າອົງການ JICA ປະຈຳ ສປປ ລາວ ເພື່ອເຂົ້າຢ້ຽມຢາມຂ່ຳນັບ ແລະ ກ່າວອຳລາ ທີ່ໄດ້ສິ້ນສຸດວາລະການເຮັດວຽກ ຢູ່ ສປປ ລາວ ໃນທ້າຍເດືອນກຸມພາ 2024 ທີ່ຜ່ານມາ ແລະ ແນະນຳ ທ່ານ ນາງ Miyako KOBAYASHI (SAKUDO), ຜູ້ຈະມາຮັບວາລະປະຈຳການເປັນຫົວໜ້າອົງການ JICA ປະຈຳ ສປປ ລາວ ຕໍ່ໄປ. ຊຶ່ງການພົບປະໃນຄັ້ງນີ້ ກໍ່ມີ ຕາງໜ້າຈາກອົງການ JICA ແລະ ຕາງໜ້າຈາກກົມກ່ຽວຂ້ອງ ກໍ່ເຂົ້າຮ່ວມ.
ທ່ານລັດຖະມົນຕີ ກໍ່ໄດ້ກ່າວ: ສະແດງຄວາມຂອບໃຈ ທີ່ ລັດຖະບານ ຍີ່ປຸ່ນ ກໍຄື ຫ້ອງການ JICA ທີ່ໄດ້ໃຫ້ການຮ່ວມມື ແລະ ຊ່ວຍເຫຼືອສະໜັບສະໜູນ ສປປ ລາວ ກໍຄື ກະຊວງ ອຄ ເປັນຕົ້ນແມ່ນການຊຸກຍູ້ສົ່ງເສີມການຄ້າ ແລະ ການຮ່ວມມືສອງຝ່າຍ, ການຍົກລະດັບບຸກຄະລາກອນການຄ້າ ຜ່ານຮູບແບບໃຫ້ທຶນການສຶກສາ JDS ທີ່ເປີດໃຫ້ພະນັກງານລັດຖະກອນ ສາມາດຍື່ນສະມັກໄດ້ ໃນລະບົບປະລິນຍາໂທ ແລະ ປະລິນຍາເອກໃນນັ້ນ ພະນັກງານລັດຖະກອນ ຂອງກະຊວງ ອຄ ກໍໄດ້ຮັບທຶນການສຶກສາຈາກ JICA ຫຼາຍທ່ານ, ການຊ່ວຍເຫຼືອດ້ານຊ່ຽວຊານວິຊາການ ແລະ ອື່ນໆ;
- ສຳລັບໂຄງການຮ່ວມມືດ້ານວິຊາການ ທີ່ JICA ໄດ້ສະໜອງທຶນໃນຮູບແບບຊ່ວຍເຫຼືອລ້າ ແລະ ທຶນກູ້ຢືມ ໃນປີ 2017; ໂດຍໄດ້ມີການສະໜອງຊ່ຽວຊານດ້ານການເງິນ SME ແລະ ໂຄງການຮ່ວມມືກັບພາກເອກະຊົນ ໂດຍສະເພາະແມ່ນການສະໜັບສະໜູນບໍລິສັດຂອງຍີ່ປຸ່ນ ເພື່ອໃຫ້ມີການຂະຫຍາຍການລົງທຶນໃນ ສປປ ລາວ ເປັນຕົ້ນແມ່ນ ບໍລິສັດ Nissan Steel Industry;
- ສຳລັບການສະໜອງອາສາສະມັກຍີ່ປຸ່ນ ເພື່ອມາເຮັດວຽກຊ່ວຍເຫຼືອດ້ານວິຊາການ, ຊຶ່ງປະຈຸບັນ ກໍມີ ອາສາສະມັກ 1 ທ່ານ ຊື່ Mr. Kenta ທີ່ພວມປະຈຳການຢູ່ ພະແນກອຸດສາຫະກຳ ແລະ ການຄ້າແຂວງວຽງຈັນ ຮັບຜິດຊອບວຽກພັດທະນາຜະລິດຕະພັນ ແລະ ໃນປີຜ່ານໆ ມາກໍມີຫຼາຍໆ ທ່ານມາແຕ່ລະໄລຍະ.
ໃນນັ້ນທ່ານຍັງໄດ້ກ່າວເນັ້ນໃສ່ ການກະກຽມເພື່ອງານການຄ້າໂລກ World Expo 2025 (Osaka) ທີ່ໃຫ້ການຈະສະໜັບສະໜູນ ບຸກຄະລາກອນຂອງກະຊວງ ອຄ ໄປເຂົ້າຮ່ວມຝຶກອົບຮົມດ້ານການກະກຽມ ແລະ ເຂົ້າຮ່ວມງານວາງສະແດງໂລກ ທີ່ໂອຊາກາ ຈໍານວນ 01 ທ່ານ, ຄາດວ່າຈະເລີ່ມແຕ່ເດືອນ ພະຈິກ 2024 – ຕຸລາ 2025 (ໃນໄລຍະ 01 ປິ). ເພື່ອເປັນການສ້າງບຸກຄະລາກອນ ໃຫ້ກາຍເປັນຜູ້ຊໍານານດ້ານວຽກງານວາງສະແດງໂລກ, ຖ້າເປັນໄປໄດ້ ສະເໜີ JICA ພິຈາລະນາ ເພີ່ມເປັນ 02 ທ່ານ.
- ເພື່ອເປັນການໂຄສະນາປະເທດລາວ ໃຫ້ເຂົ້າເຖິງຄົນຍີ່ປຸ່ນໄດ້ເປັນຢ່າງດີ, ສະເໜີ JICA ຊ່ວຍສະໜັບສະໜູນ ອາສາສະໝັກຍີ່ປຸ່ນ ທີ່ຮູ້ຈັກປະເທດລາວດີ ເຂົ້າມາຊ່ວຍໃຫ້ຂໍ້ມູນກ່ຽວກັບປະເທດລາວ ໃນຫ້ອງວາງສະແດງແຫ່ງຊາດ
- ສະເໜີ JICA ສະໜັບສະໜູນ ການຈັດງານໃນໄລຍະງານວາງສະແດງ ເຊັ່ນ: Lao Handicraft Week, JICA in Laos Week (ວາງສະແດງຜົນງານຂອງໄຈກາ ທີ່ຊ່ວຍພັດທະນາປະເທດລາວ ໃນໄລຍະຜ່ານມາ), Laos – Japan Week (ສະເຫຼີມສະຫຼອງສາຍພົວພັນ ລາວ-ຍີ່ປຸ່ນ ຄົບຮອບ 70 ປີ), Laos Digital Week, Laos New Year Week ແລະ ອື່ນໆ.
ທ້າຍສຸດນີ້, ທ່ານໄດ້ກ່າວສະແດງຄວາມຂອບໃຈອິກຄັ້ງຕໍ່່ ທ່ານ Toshio NAGASE, ຫົວໜ້າອົງການ JICA ປະຈຳ ສປປ ລາວ (ຄົນເກົ່າ) ທີ່ໄດ້ສຳເລັດ ວາລະຂອງການປະຈຳການ ຢູ່ ຫ້ອງການ JICA ປະຈຳ ສປປ ລາວ ແລະ ໄດ້ປະກອບສ່ວນຢ່າງຕັ້ງໜ້າ ໃນການຊຸກຍູ້ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ແລະ ທັງໃຫ້ການສະໜັບສະໜູນວຽກງານພັດທະນາຕ່າງໆ ໃນ ສປປ ລາວ ກໍຄື ຂະແໜງການຄ້າ; ພ້ອມທັງ ອວຍພອນໄຊອັນປະເສີດ ໃຫ້ ທ່ານ Toshio NAGASE ຈົ່ງເດີນທາງກັບປະເທດ ຍີ່ປຸ່ນ ດ້ວຍຄວາມສະຫວັດດີພາບ ແລະ ຈົ່ງປະສົບຜົນສຳເລັດໃນການປະຕິບັດໜ້າທີ່ວຽກງານໃໝ່ ທີ່ທ່ານຈະໄດ້ຮັບດ້ວຍ; ຫວັງຢ່າງຍິ່ງ ວ່າຈະໄດ້ ຮ່ວມມືກັນໃນອານາຄົດຕໍ່ໜ້າ; ແລະ ໄດ້ກ່າວຕ້ອນຮັບ ທ່ານ ທ່ານນາງ Miyako KOBAYASHI (SAKUDO) ຫົວໜ້າອົງການ JICA ປະຈຳ ສປປ ລາວ (ຄົນໃໝ່) ທີ່ຈະມາປະຈຳການທີ່ຫ້ອງການ JICA ປະຈຳ ສປປ ລາວ ເພື່ອສືບຕໍ່ວາລະ ອັນສຳຄັນຍິ່ງ ແທນຫົວໜ້າຄົນເກົ່າ ແລະ ອວຍໄຊໃຫ້ພອນໃຫ້ ທ່ານ ຈົ່ງປະສົບຜົນສຳເລັດໃນໜ້າທີ່ຄັ້ງນີ້ດ້ວຍ ແລະ ທາງການຊວງ ອຄ ກໍຍິນດີ ຈະສືບຕໍ່ ໃຫ້ການຮ່ວມມື ກັບ ຫ້ອງການ JICA ແລະ ເພີ່ມທະວີສາຍພົວພັນ ລະຫວ່າງ ສປປ ລາວ ແລະ ຍີ່ປຸ່ນ ໃຫ້ແໜ້ນແຟ້ນຂຶ້ນກ່ວາເກົ່າ.
ຂ່າວ-ພາບ: ເພັປະກາຍ ສີສົມບູນ
