ໃນລະຫວ່າງວັນທີ 29-30 ມັງກອນ 2024 ກົມເຈລະຈາການຄ້າ ແລະ ຮ່ວມມືເສດຖະກິດສາກົນ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມປຶກສາຫາລື ກ່ຽວກັບການປັບປຸງບາງເນື້ອໃນຂອງສັນຍາການຄ້າສອງຝ່າຍ ລາວ-ຫວຽດນາມ ທີ່ກະຊວງ ອຄ ເຂົ້າຮ່ວມພົບປະສອງຝ່າຍມີ ທ່ານ ໄຊຊະນະ ໄຊຍະກອນ ຫົວໜ້າກົມເຈລະຈາການຄ້າ ແລະ ຮ່ວມມືເສດຖະກິດສາກົນ ກະຊວງ ອຄ ສປປ ລາວ ແລະ ທ່ານ ໂດ້ ກວັກ ຮຶງ ຮອງຫົວໜ້າກົມອາຊີ-ອາຟຣິກກາ, ກະຊວງ ອຄ ແຫ່ງ ສສ ຫວຽດນາມ ເປັນຫົວໜ້າຄະນະຝ່າຍຫວຽດນາມ ພ້ອມດ້ວຍພະນັກງານທັງສອງເຂົ້າຮ່ວມ.
ສັນຍາການຄ້າສອງຝ່າຍ ລະຫວ່າງ ສປປ ລາວ ແລະ ຫວຽດນາມ ໄດ້ລົງນາມໃນວັນທີ 03 ມີນາ 2015 ທີ່ ນະຄອນຫລວງວຽງຈັນ, ສັນຍາສະບັບນີ້ ມີທັງໝົດ 06 ໝວດ ແລະ 16 ມາດຕາ ມີຜົນບັງຄັບໃຊ້ໃນໄລຍະ 05 ປີ ແລະ ສາມາດຕໍ່ອາຍຸໂດຍອັດຕະໂນມັດອອກໄປທຸກໆ 03 ປີ; ສັນຍາສະບັບນີ້ ສ້າງຂຶ້ນເພື່ອຈຸດປະສົງໃນການເພີ່ມທະວີ ແລະ ຍົກສູງມິດຕະພາບແບບພິເສດ ແລະ ການຮ່ວມມືຮອບດ້ານ, ສົ່ງເສີມການເຂົ້າເຖິງຕະຫຼາດດ້ານສິນຄ້າ, ດ້ານບໍລິການ ແລະ ພັດທະນາການເຊື່ອມຈອດ ລະຫວ່າງສອງປະເທດໃຫ້ມີຄວາມໝັ້້ນຄົງ, ຍືນຍົງ ແລະ ຍາວນານ; ບົນຫຼັກການສະເໝີພາບ, ຕ່າງຝ່າຍຕ່າງມີຜົນປະໂຫຍດ ໂດຍສອດຄ່ອງກັບບັນດາກົດໝາຍ, ລະບຽບການ ແລະ ນະໂຍບາຍຂອງແຕ່ລະປະເທດ ແລະ ເສີມສ້າງມິດຕະພາບ ແລະ ຄວາມສາມັກຄີແບບພິເສດຂອງສອງຊາດ ລາວ-ຫວຽດນາມ; ສ້າງຄວາມສະດວກໃຫ້ແກ່ການນໍາເຂົ້າ-ສົ່ງອອກສິນຄ້າ ແລະ ການບໍລິການ ດ້ວຍຮູບການໃຫ້ບູລິມະສິດພິເສດເຊິ່ງກັນ ແລະ ກັນ ຕໍ່ກັບການຄ້າດ້ານສິນຄ້າ ແລະ ການຄ້າດ້ານບໍລິການ.
ເພື່ອເຮັດໃຫ້ເນື້ອໃນຂອງສັນຍາ ສອດຄ່ອງກັບການຂະຫຍາຍຕົວທາງດ້ານເສດຖະກິດ ຂອງສອງຝ່າຍໃນສະພາບການໃໝ່, ໃນຕົ້ນປີ 2021 ທັງສອງຝ່າຍ ໄດ້ຕົກລົງເຫັນດີເປັນເອກະພາບຮ່ວມກັນ ໃນການປັບປຸງເນື້ອໃນສັນຍາບາງຈຸດຄືນໃໝ່. ທັງສອງຝ່າຍ ໄດ້ປຶກສາຫາລື ແລກປ່ຽນຄຳຄິດຄຳເຫັນ ຜ່ານກົນໄກກອງປະຊຸມແບບທາງໄກ ແລະ ຜ່ານທາງໂທລະສັບ ໃນລະດັບຂັ້ນກົມ. ພ້ອມກັນນັ້ນ, ຝ່າຍຫວຽດນາມ ໄດ້ນໍາສະເໜີ ຮ່າງສັນຍາສະບັບປັບປຸງ ແລະ ບັນຊີສະຫງວນໃນເອກະສານຊ້ອນທ້າຍ 2b ໃຫ້ຝ່າຍລາວພິຈາລະນາ; ຊຶ່ງຝ່າຍລາວ ໄດ້ສົ່ງຄຳເຫັນຕໍ່ກັບເນື້ອໃນຮ່າງສັນຍາ ແລະ ບັນຊີສະຫງວນໃນເອກະສານຊ້ອນທ້າຍ 2b ໃຫ້ຝ່າຍຫວຽດນາມ ເປັນທີ່ຮຽບຮ້ອຍແລ້ວ.
ສອງຝ່າຍ ໄດ້ປຶກສາຫາລື ແລກປ່ຽນຄຳຄິດຄຳເຫັນ ຢ່າງກົງໄປກົງມາ ແລະ ສະເໜີໃຫ້ພາກສ່ວນກ່ຽວຂ້ອງຮີບຮ້ອນດໍາເນີນການປັບປຸງເນື້ອໃນສັນຍາການຄ້າ ຂອງຕົນໃຫ້ສໍາເລັດໂດຍໄວ ເພື່ອໃຫ້ສາມາດສະເໜີຕໍ່ລັດຖະບານຂອງສອງປະເທດ ພິຈາລະນາ ແລະ ອະນຸມັດລົງນາມສັນຍາການຄ້າສອງຝ່າຍ (ສະບັບປັບປຸງ) ໃຫ້ສໍາເລັດ ພາຍໃນໄຕມາດທີ 1 ປີ 2024.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
