ຕອນບ່າຍໃນວັນທີ 18 ມັງກອນ 2024, ທີ່ຫ້ອງຮັບແຂກກອງທັບກະຊວງປ້ອງກັນປະເທດເປັນວັນສ້າງຕັ້ງກອງທັບ ຄົບຮອບ 75 ປີ, ຕ້ອນຮັບນໍາໂດຍ ທ່ານ ພົນໂທ ທອງລອຍ ສີລິວົງ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ ໄດ້ຕ້ອນຮັບການເຂົ້າອວຍພອນຈາກພາກສ່ວນລັດກະຊວງອຸດສາຫະກໍາ ແລະ ການຄ້າ ນໍາດ້ວຍ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ຕາງໜ້າຫົວໜ້າຫ້ອງການ ແລະ ບັນດາຫົວໜ້າກົມ, ສະພາການຄ້າອຸດສາຫະກໍາແຫ່ງຊາດ ແລະ ບໍລິສັດເບຍລາວ ອ້ອມຂ້າງກະຊວງອຸດສາຫະກໍາ ແລະ ການຄ້າ ຫຼາຍພາກສ່ວນກ່ຽວຂ້ອງເຂົ້າຮ່ວມ.

         ເນື່ອງໃນໂອກາດວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ ( 20 ມັງກອນ 1949-20 ມັງກອນ 2024) ກະຊວງອຸດສາຫະກໍາ ແລະ ການຄ້າ ໃນການມອບວັດຖຸປະໃຈຄັ້ງນີ້: ເຊິ່ງໄດ້ນໍາເອົາກະຕ່າຂອງຂວັນ, ນໍ້າດຶ່ມ, ແປບຊີ, ເຊເວັນອັບ ມູນຄ່າລວມທັງໝົດ 7,080,000 ກີບ ແລະ ເຂົ້າອວຍພອນໄຊອັນປະເສີດ, ເນື່ອງໃນໂອກາດວັນສ້າງຕັ້ງກອງທັບ ປະຊາຊົນລາວ ຄົບຮອບ 75 ປີ.

       ໂອກາດນີ້, ສະຫາຍ ພົນໂທ ທອງລອຍ ສີລິວົງ ກໍໄດ້ຕາງໜ້າໃຫ້ຄະນະພັກ ຄະນະນໍາກະຊວງປ້ອງກັນປະເທດ ສະແດງຄວາມຂອບອົກຂອບໃຈ ພ້ອມທັງອວຍພອນໄຊອັນປະເສີດ ໃຫ້ແກ່ຄະນະນໍາກະຊວງ ແລະ ທົ່ວກະຊວງອຸດສາຫະກໍາ ແລະ ການຄ້າ ຈົ່ງມີ ສຸຂະພາບເຂັ້ມແຂງອາຍຸໝັ້ນຂວັນຍືນ ມີຜົນສໍາເລັດໃນໜ້າທີ່ການເມືອງຂອງຕົນທຸກປະການ.

ຂ່າວ-ພາບ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ ກະຊວງ ອຄ.