ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມຄະນະກໍາມະການ ຊີ້ນໍາແຜນງານຈັດຕັ້ງປະຕິບັດໂຄງການ ປະຈຳປີ 2023 ຂື້ນໃນວັນ18 ທັນວາ 2023 ທີ່ໂຮງແຮມ ຄຣາວພາຊາ ພາຍໃຕ້ການເປັນປະທານຂອງທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກຳ ແລະ ການຄ້າ (ອຄ) ພ້ອມດ້ວຍຜູ້ເຂົ້າຮ່ວມຈາກບັນດາຄູ່ຮ່ວມພັດທະນາ, ພາກສ່ວນຈັດຕັ້ງປະຕິບັດໂຄງການ ແລະ ຄູ່ຮ່ວມຈັດຕັ້ງປະຕິບັດໂຄງການຈາກພາກລັດ ແລະ ພາກເອກະຊົນ ເຂົ້າຮ່ວມຈຳນວນ 100 ທ່ານ.
ກອງປະຊຸມໃນຄັ້ງນີ້ ແມ່ນເພື່ອປຶກສາຫາລື ບັນດາຜົນງານໄດ້ຮັບທີ່ຫຼັກທີ່ຍາດມາໄດ້ ຈາກສອງໂຄງການທີ່ຫາກໍ່ສຳເລັດລົງ ເຊິ່ງລວມມີ ໂຄງການ ສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜືອຂອງ ສປປ ລາວ ຫຼື ECL-EIF Tier II ແລະ ໂຄງການ ສະໜັບສະໜູນ ສປປ ລາວ ໃນການເຊື່ອມໂຍງພາກພື້ນອາຊຽນ ຫຼື ARISE Plus Laos ທີ່ ສະໜັບສະໜູນໂດຍສະຫະພາບເອີຣົບ ພ້ອມທັງໄດ້ທົບທວນຄືນ ແລະ ປຶກສາຫາລື ຄວາມຄືບໜ້າການຈັດຕັ້ງປະຕິບັດໂຄງການ ສຳລັບສົກປີ 2023 ແລະ ແຜນວຽກບູລິມະສິດສຳລັບສົກປີ 2024 ຂອງໂຄງການ ສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ໂຄງການເຂົ້າເຖິງແຫຼ່ງທຶນຂອງຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ເພື່ອຮັບມືກັບຜົນກະທົບ ແລະ ຟື້ນຟູຈາກໂຄວິດ-19 ຫຼື MSME A2F-ESR, ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ຫຼື LBE ແລະ ໂຄງການ ສົ່ງເສີມ ການສົ່ງອອກ ເຄື່ອງຕົບແຕ່ງເຮືອນ ແລະ ແຜ່ນແພ ຫຼື CBI-Home Textile.
ທ່ານ ມະໄລທອງ ກົມມະສິດ, ລັດຖະມົນຕີ ກະຊວງ ອຄ ໄດ້ກ່າວວ່າ: ກອງປະຊຸມໃນມື້ນີ້ ແມ່ນການສະແດງໃຫ້ເຫັນເຖິງຄວາມມຸ່ງໝັ້ນຮ່ວມກັນຂອງພວກເຮົາ ໃນການພັດທະນາຂະແໜງການຄ້າ ແລະ ພາກເອກະຊົນຂອງລາວ. ຄືດັ່ງພວກທ່ານຮູ້ນຳກັນກ່ຽວກັບ ບົດບາດຄວາມສຳຄັນຂອງພາກເອກະຊົນ ໃນການພັດທະນາເສດຖະກິດ, ການສ້າງ ວຽກເຮັດງານທຳ ແລະ ການຮັກສາສະຖຽນລະພາບທາງສັງຄົມກໍ່ ໄດ້ຮັບການຮັບຮູ້ ແລະ ຍອມຮັບຈາກລັດຖະບານຂອງພວກເຮົາ ກໍ່ຄືໃນສັງຄົມໂດຍລວມ. ປະຈຸບັນ, ການພັດທະນາພາກເອກະຊົນ ໄດ້ກາຍເປັນອົງປະກອບທີ່ຈຳເປັນ ຂອງວາລະແຫ່ງຊາດຂອງພວກເຮົາ ລວມມີ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 9 ລວມທັງການພັດທະນາຂະ ແໜງການອື່ນໆ ສຳລັບ ປີ 2021-2025.
ການປຶກສາຫາລືໃນພາກທຳອິດ ໄດ້ສຸມໃສ່ບັນດາຜົນໄດ້ຮັບທີ່ສຳຄັນທີ່ຍາດມາໄດ້ຈາກສອງໂຄງການ ທີ່ຈົບລົງໄປແລ້ວນັ້ນ ແລະ ໃນພາກທີສອງ ກອງປະຊຸມໄດ້ສຸມໃສ່ໃນການປຶກສາຫາລື ຜົນໄດ້ຮັບທີ່ສຳຄັນທີ່ຍາດມາໄດ້ໃນ ປີ 2023 ແລະ ບັນດາແຜນບູລິມະສິດສຳລັບ ປີ 2024 ສຳລັບ 5 ໂຄງການທີ່ກຳລັງໄດ້ຮັບການສະໜັບສະໜູນຈາກຜູ້ໃຫ້ທຶນ ໃນການແຊກແຊງມາດຕະການສະເພາະເຂົ້າໃນສາມເສົາຄ້ຳຂອງແຜນງານພັດທະນາຂະແໜງການຄ້າ ແລະ ພາກເອກະຊົນ ເຊິ່ງລວມມີ ການເຊື່ອມໂຍງເສດຖະກິດທີ່ເລິກເຊິ່ງກ່ວາເກົ່າ, ການປັບປຸງສະພາບແວດລ້ອມຂອງການດຳເນີນທຸລະກິດທີ່ເອື້ອອຳນວຍ ແລະ ການຍົກລະດັບຄວາມອາດສາມາດໃນການແຂ່ງຂັນຂອງບັນດາບໍລິສັດ ແລະ ຂະແໜງການ.
ພາຍຫຼັງການປຶກສາຫາລືກັນຢ່າງຕັ້ງໜ້າ ກ່ຽວກັບບັນດາຜົນໄດ້ຮັບທີ່ສຳຄັນ ລວມທັງບັນດາສິ່ງທ້າທາຍທີ່ປະເຊີນໃນການຈັດຕັ້ງປະຕິບັດໂຄງການ ໃນລະຫວ່າງ ປີ 2023 ແລະ ນຳສະເໜີບັນດາແຜນບູລິມະສິດສຳລັບ ປີ 2024, ກອງປະຊຸມໄດ້ຮັບຮອງເອົາບັນດາແຜນບູລິມະສິດທັງໝົດສຳລັບ 5 ໂຄງການ ທີ່ໄດ້ຮັບການນຳສະເໜີໃນກອງປະຊຸມຄັ້ງນີ້.
ທ່ານ ມະໄລທອງ ກົມມະສິດ ໄດ້ຕີລາຄາສູງຕໍ່ບັນດາຄູ່ຮ່ວມພັດທະນາ ສຳລັບບັນດາຄຳໝັ້ນໝາຍ ແລະ ການສະໜັບສະໜູນແກ່ວາລະການພັດທະນາຂະແໜງການຄ້າ ແລະ ພາກເອກະຊົນໃນ ສປປ ລາວ ແລະ ທ່ານ ລັດຖະມົນຕີ ຍັງໄດ້ຮຽກຮ້ອງມາຍັງທຸກພາກສ່ວນຈັດຕັ້ງປະຕິບັດໂຄງການ ໃຫ້ມີຄວາມພະຍາຍາມເພີ່ມເຕີມອີກ ໃນການປະກອບສ່ວນເຂົ້າໃນການຈັດຕັ້ງປະຕິບັດແຜນຟື້ນຟູເສດຖະກິດຂອງລັດຖະບານ ໂດຍຜ່ານການການສະໜອງທຶນການຊ່ວຍເຫຼືອດ້ານວິຊາການທີ່ໄດ້ວາງອອກເປັນຢ່າງດີ.
ຂ່າວ-ພາບ: ໄພວັນ ໂຄດວັນທາ ຂ່າວສານ ອຄ
