ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ຕ້ອນຮັບການເຂົ້າພົບຂອງທ່ານ ຫວັງ ຮ້າວ ຮອງເຈົ້າແຂວງຢຸນນານ ສປ ຈີນ ພ້ອມດ້ວຍຄະນະ ທີ່ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນວັນທີ 10 ທັນວາ 2023 ທີ່ກະຊວງອຸດສາຫະກໍາ ແລະ ການຄ້າ.

ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ກ່າວບາງຕອນວ່າ:  ສະແດງຄວາມຕ້ອນຮັບ ທ່ານ ຫວັງ ຮ້າວ ຮອງເຈົ້າແຂວງຢຸນນານ ທັງເປັນຫົວນ້າຄະນະຜູ້ແທນ ທີ່ໃຫ້ກຽດມາພົບປະຢ້ຽມຢາມ ກະຊວງ ອຄ ເພື່ອປຶກສາຫາລືຊຸກຍູ້ວຽກງານ ການຮ່ວມມື, ປະຈຸບັນ ສປ ຈີນ ຍັງສືບຕໍ່ເປັນຄູ່ຄ້າສໍາຄັນ ອັນດັບ 2 ຂອງ ສປປ ລາວ ຖັດຈາກ ໄທ. ອີງຕາມຕົວເລກສະຖິຕິຈາກຝ່າຍຈີນ ເຫັນວ່າໃນປີ 2021 ມູນຄ່າການຄ້າສອງຝ່າຍ ລາວ-ຈີນ ສາມາດບັນລຸໄດ້ 4,35 ຕື້ ໂດລາ, ໃນນັ້ນມູນຄ່າການນໍາເຂົ້າແມ່ນ 1,67 ຕື້ໂດລາ ແລະ ມູນຄ່າການສົ່ງອອກ ແມ່ນ 2,68 ຕື້ໂດລາ. ໃນປີ 2022 ເຫັນວ່າມູນຄ່າການຄ້າສອງຝ່າຍມີການເພີ່ມຂຶ້ນແບບກ້າວກະໂດດ ໂດຍມູຸນຄ່າການຄ້າສອງຝ່າຍສາມາດບັນລຸໄດ້ 5,68 ຕື້ໂດລາ ເພີ່ມຂຶ້ນ 31% ຖ້າທຽບໃສ່ ປີ 2021; ໃນນັ້ນມູນຄ່າການນໍາເຂົ້າແມ່ນ 2,34 ຕື້ໂດລາ, ເພີ່ມຂຶ້ນ 40,9% ແລະ ມູນຄ່າການສົ່ງອອກແມ່ນ 3,34 ຕື້ ໂດລາ, ເພີ່ມຂຶ້ນ 24,9%.

ສະເພາະ ລາວ-ຢຸນນານ ໃນປີ 2022 ມູຸນຄ່າການຄ້າສອງຝ່າຍສາມາດບັນລຸໄດ້ 1,74  ຕື້ໂດລາ ເພີ່ມຂຶ້ນ 33.7% ຖ້າທຽບໃສ່ ປີ 2021; ໃນນັ້ນມູນຄ່າການນໍາເຂົ້າແມ່ນ 370 ລ້ານໂດລາ, ເພີ່ມຂຶ້ນ 16.3% ແລະ ມູນຄ່າການສົ່ງອອກແມ່ນ 1,37 ຕື້ ໂດລາ, ເພີ່ມຂຶ້ນ 39.3%.

ໃນເດືອນ 10 ປີ 2023 ມູນຄ່າການຄ້າລະຫວ່າງ ສປປ ລາວ ແລະ ຢູນນານ ສາມາດບັນລຸໄດ້ 1,478.34 ລ້ານໂດລາ ເພີ່ມຂື້ນ 7%, ລາວສົ່ງອອກ 984.29 ລ້ານໂດລາ ຫລຸດລົງ -8.4% ແລະ ລາວນໍາເຂົ້າ 494.05 ລ້ານໂດລາ ເພີ່ມຂື້ນ 60.9%. ເມື່ອທຽບໃສ່ໃນໄລຍະດຽວກັນຂອງປີຜ່ານມາ.

ໂອກາດດັ່ງກ່າວ ໄດ້ສະເໜີແລກປ່ຽນກັບຄະນະຜູ້ແທນເພີ່ມຕື່ມຄື: ໂດຍສະເພາະຂໍສະແດງຄວາມຊົມເຊີຍຕໍ່ກຸ່ມບໍລິສັດກໍ່ສ້າງລົງທຶນ ແລະ ຖືຮຸ້ນແຂວງຢຸນນານ ຈໍາກັດ ທີ່ໄດ້ເປັນກໍາລັງແຮງໜຶ່ງທີ່ສໍາຄັນ ແລະ ໜ້າເຊື່ອຖືໄດ້ໃຫ້ແກ່ການຮ່ວມມືເສດຖະກິດການຄ້າ ລາວ-ຢູນນານ ແລະ ຍັງໄດ້ລົງທຶນພັດທະນາເຂດພັດທະນາກວມລວມໄຊເສດຖາ ແລະ ໄດ້ສ້າງອາຊີບໃຫ້ແກ່ພົນລະເມືອງລາວໄດ້ຫຼາຍກວ່າ 10.000 ຄົນ.

ປັດຈະບັນນີ້, ສປປ ລາວ ກໍຄືກະຊວງອຸດສາຫະກໍາ ແລະ ການຄ້າ ກໍາລັງສຸມໃສ່ກະກຽມຄວາມພ້ອມໃນດ້ານຕ່າງໆ ເພື່ອກະກຽມເປັນປະທານອາຊຽນໃນປີ 2024, ດ້ວຍເຫດນີ້ຈຶ່ງສະເໜີມາຍັງທ່ານ ເພື່ອສະໜັບສະໜູນ ແລະ ຊ່ວຍເຫຼືທາງດ້ານວິຊາການ ເປັນຕົ້ນແມ່ນການສ້າງຍຸດທະສາດພັດທະນາ ແລະ ຄຸ້ມຄອງການຄ້າທາງດ້ານເອເລັກໂຕນິກ, ການສົ່ງເສີມວຽກງານ Circula Economy ແລະ ສະນັບສະໜູນສ້າງຫ້ອງປະຊຸມທາງໄກ ພ້ອມທັງລະບົດ ແລະ ອຸປະກອນຮັບໃຊ້ຄົບຊຸດ. ນອກນັ້ນຍັງມີວຽກງານອື່ນໆອີກຈໍານວນໜຶ່ງ.

ຂ່າວ-ພາບ: ໄພວັນ ໂຄດວັນທາ ຂ່າວສານ ອຄ.