ຕອນບ່າຍ ເວລາ 15 : 30 ໂມງ ຂອງວັນທີ 08 ທັນວາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າພົບປະຢ້ຽມຢາມຂອງ ທ່ານ ຄິມ ເທຮືມ (Kim Tea Heum) ເຈົ້າແຂວງຊຸງຊອງນໍາໂດ ແຫ່ງ ສ ເກົາຫລີ ພ້ອມຄະນະ, ມີຜູ້ຕາງໜ້າຈາກສອງຝ່າຍເຂົ້າຮ່ວມ ຈໍານວນປະມານ 39 ທ່ານ.
ໃນໂອກາດພົບປະຄັ້ງນີ້ ທ່ານລັດຖະມົນຕີ ກະຊວງ ອຄ ໄດ້ສະແດງຄວາມຍິນດີຕ້ອນຮັບ ທ່ານ ຄິມ ເທຮືມ (Kim Tea Heum) ພ້ອມຄະນະທີ່ໄດ້ມາເຄື່ອນໄຫວວຽກງານຂອງຕົນ ຢູ່ ສປປ ລາວ ຊຶ່ງທ່ານໄດ້ສະເໜີ ບາງບັນຫາໃນການປຶກສາຫາລື ກັບທ່ານເຈົ້າແຂວງຊຸງຊອງນໍາໂດ ຄື: ປະຈຸບັນ, ສປປ ລາວ ເວົ້າລວມ, ເວົ້າສະເພາະກະຊວງອຸດສາຫະກໍາ ແລະ ການຄ້າ ແມ່ນກໍາລັງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ (2021-2025) ຊຶ່ງຂະແໜງອຸດສາຫະກໍາ ແລະ ການຄ້າກໍ່ໄດ້ມີສ່ວນຮ່ວມໃນເປົ້າໝາຍທີ 1 (ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ) ທີ່ສຸມໃສ່ແຜນວຽກຈຸດສຸມພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ສູ່ຄຸນນະພາບໃຫມ່ໃຫ້ມີຄວາມເຂັ້ມແຂງ ແລະ ສາມາດແຂ່ງຂັນກັບພາກພື້ນ ແລະ ສາກົນໄດ້ ແລະ ເປົ້າໝາຍທີ 5 (ການສ້າງໂຄງລ່າງພື້ນຖານທີ່ມີຄວາມເຂັ້ມແຂງ, ນໍາໃຊ້ທ່າແຮງ, ກາລະໂອກາດທີ່ຕັ້ງ, ເຂົ້າຮ່ວມຂະບວນການຮ່ວມມື ແລະ ການເຊື່ອມໂຍງກັບພາກພື້ນ ແລະສາກົນຢ່າງເປັນເຈົ້າການ) ທີ່ສຸມໃສ່ພັດທະນາວຽກງານໂຄງລ່າງພື້ນຖານໄດ້ຮັບການພັດທະນາ ທີ່ສາມາດເຊື່ອມໂຍງເຊື່ອມຈອດພາຍໃນ, ພາກພື້ນ ແລະ ສາກົນ ເພື່ອເອື້ອອໍານວຍໃຫ້ແກ່ການຜະລິດ, ການບໍລິການ, ການຄ້າ ແລະ ການລົງທຶນ ທີ່ຕິດພັນກັບບາງໂຄງການບູລິມະສິດ ເປັນຕົ້ນໂຄງການສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ໂຄງການສົ່ງເສີມ ແລະ ພັດທະນາອຸດສາຫະກໍາປຸງແຕ່ງໃຫ້ເຕີບໂຕ ມີຄຸນນະພາບຕາມທິດສົມດູນ,ສີຂຽວ ແລະ ຍືນຍົງ; ໂຄງການສົ່ງເສີມຄວາມອາດສາມາດໃນການແຂ່ງຂັນຂອງ ສປປ ລາວ, ໂຄງການສົ່ງເສີມການເຈລະຈາທາງດ້ານການຄ້າໃນຂອບພາກພື້ນອາຊຽນ (AEC) ແລະ ອົງການອາຫານໂລກ (WHO) ແລະ ອື່ນໆ. ນອກນີ້, ຍັງໄດ້ສະເໜີໃຫ້ທ່ານຊ່ວຍສະໜັບສະໜູນ ເພື່ອກຽມຄວາມພ້ອມໃນການເປັນປະທານກອງປະຊຸມອາຊຽນ ແລະ ທັງເປັນການເປີດປີທ່ອງທ່ຽວ ຂອງສປປ ລາວໃນປີ 2024.
ພ້ອມດຽວກັນນີ້, ທ່ານ ຄິມ ເທຮືມ (Kim Tea Heum) ໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບ ແລະ ຍົກບາງບັນຫາມາປຶກສາຫາລືກ່ຽວກັບ ແຜນການຮ່ວມມືກັບຝ່າຍລາວ ໃນການເຮັດ Smart Farm ຫັນເປັນດິຈີຕອນ ຍຸກ 6.0 ຢູ່ລາວ, ຊຶ່ງທາງແຂວງ ຊຸງຊອງນໍາໂດ ແຫ່ງ ສ ເກົາຫລີ ມີບົດຮຽນອັນດີເດັ່ນໃນການດໍາເນີນທຸລະກິດແບບຄົບວົງຈອນ; ແລະ ລາຍງານຜ່ານມາທ່ານເຈົ້າແຂວງພ້ອມຄະນະ ກໍ່ໄດ້ເຂົ້າພົບປະກັບທ່ານລັດຖະມົນຕີກະຊວງກະສິກໍາ ແລະ ປ່າໄມ້ ຂອງລາວ ໃນການປຶກສາຫາລື ແລະ ຊອກຫາແນວທາງຂອງການຮ່ວມມືໃນຕໍ່ໜ້າ. ພ້ອມດຽວກັນນີ້, ທ່ານລັດຖະມົນຕີ ກໍ່ໄດ້ສະແດງຄວາມຍິນດີ ຊຶ່ງທາງກະຊວງ ອຄ ແມ່ນຈະເອື້ອອໍານວຍຄວາມສະດວກຕໍ່ການເຮັດທຸລະກິດ ຂອງຕ່າງປະເທດ ແລະ ຈະຮັບເອົາບັນຫາດັ່ງກ່າວນໍາໄປປຶກສາຫາລືກັບຄະນະລັດຖະບານຕື່ມ ເພື່ອເຮັດໃຫ້ເກີດຄວາມຮ່ວມມືໃນອະນາຄົດ ລະຫວ່າງ ແຂວງຊຸງຊອງນໍາໂດ ແຫ່ງ ສ ເກົາຫລີ ແລະ ແຂວງວຽງຈັນ ຂອງ ສປປ ລາວ.
ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈຕໍ່ທ່ານເຈົ້າແຂວງ ໃນການພົບປະແລກປ່ຽນຄວາມຄິດເຫັນຫຼາຍອັນທີ່ເປັນປະໂຫຍດ, ພ້ອມທັງອວຍພອນໄຊໃຫ້ທ່ານພ້ອມຄະນະ ຈົ່ງປະສົບຜົນສໍາເລັດໃນການເຄື່ອນໄຫວວຽກງານ ຢູ່ສປປ ລາວ, ຂໍເຊື້ອເຊີນທ່ານເຈົ້າແຂວງມາຢ້ຽມຢາມສປປ ລາວ ອີກໃນເວລາອັນເໝາະສົມ ແລະ ມອບເຄື່ອງທີ່ລະນຶກຜະລິດຕະພັນຝ້າຍລາວ ໃຫ້ແກ່ທ່ານ ຄິມ ເທຮືມ ເພື່ອເປັນການໂຄສະນາສິນຄ້າຂອງລາວ ໃຫ້ບັນດາປະເທດໄດ້ຮັບຮູ້ຢ່າງກວ້າງຂວາງ.
ພາບ-ຂ່າວ: ນ ຖື ແຫວນວົງສົດ ສູນສະຖິຕິ ແລະ ຂ້ໍມູນຂ່າວສານ
