ກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດພິທີ ໂຮມຊຸມນຸມ ປາຖະກະຖາ ວັນຊາດທີ 2 ທັນວາ ຄົບຮອບ 48 ປີ, ວັນຄ້າຍວັນເກີດ ປະທານໄກສອນ ພົມວິຫານ ແລະ ເຊື່ອມຊື່ມເອກະສານສໍາຄັນຂອງພັກໃນວັນທີ 1 ທັນວາ 2023 ທີ່ກະຊວງ ອຄ, ເປັນປະທານຂອງ ທ່ານ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ-ລັດຖະມົນຕີກະຊວງ ອຄ, ມີຮອງເລຂາຄະນະພັກ, ບັນດາເລຂາໜ່ວຍພັກຮາກຖານ, ສະມາຊິກພັກ-ພະນັກງານ ທົ່ວກະຊວງ ອຄ ເຂົ້າຮ່ວມ.
ໂດຍປະຕິບັດຕາມແຈ້ງການແນະນໍາຂອງຄະນະໂຄສະນາອົບຮົມສູນກາງພັກ ແລະ ການຕົກລົງເຫັນດີຂອງລັດຖະມົນຕີ ກະຊວງ ອຄ ວ່າດ້ວຍການອະນຸມັດໃຫ້ຈັດຕັ້ງປາຖະກະຖາວັນທີ່ມີຄວາມໝາຍ, ຄວາມສຳຄັນທາງປະຫວັດສາດ ຂອງພັກ, ຂອງຊາດ ແລະ ເຜີຍແຜ່ເຊື່ອມຊືມເອກະສານສຳຄັນຂອງພັກ. ເພື່ອເຮັດໃຫ້ຄະນະພັກຂັ້ນຕ່າງໆ, ພະນັກງານຫຼັກແຫຼ່ງ, ສະມາຊິກພັກ-ພະນັກງານ ໄດ້ຮັບຮູ້ເຂົ້າໃຈ, ເຊື່ອມຊຶມ, ກໍາແໜ້ນ ຢ່າງເລິກເຊິ່ງ, ທົ່ວເຖິງ ແລະ ມີຄວາມເປັນເອກະພາບສູງຕໍ່ເນື້ອໃນຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI, ຂອງຄະນະບໍລິຫານງານພັກກະຊວງ ອຄ ສະໄໝທີ V ແລະ ເນື້ອໃນເອກະສານກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ. ແນໃສ່ບັນດາຄາດໝາຍສູ້ຊົນ, ວຽກຈຸດສຸມ ແລະ ແຜນປະຕິບັດງານລະອຽດໃນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍຄືມະຕິກອງປະຊຸມໃຫຍ່ຂອງອົງຄະນະພັກກະຊວງ ອຄ ຄັ້ງທີ V ໃຫ້ເຂົ້າສູ່ການຈັດຕັ້ງປະຕິບັດຕົວຈິງ ແລະ ມີປະສິດທິຜົນສູງ.
ໃນພິທີ ທ່ານ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ-ລັດຖະມົນຕີກະຊວງ ອຄ ໃຫ້ກຽດເຜີຍແຜ່ເນື້ອໃນເອກະສານສໍາຄັນຂອງພັກຄື: 1. ຜົນສໍາເລັດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI (ສະບັບລົງວັນທີ 18 ສິງຫາ 2023); 2. ມະຕິ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນໍາພາຂອງພັກ (ເລກທີ 05/ຄບສພ, ລົງວັນທີ 5 ກັນຍາ 2023); 3. ແຜນດໍາເນີນງານ ເລກທີ 432/ຄລສພ, ລົງວັນທີ 8 ກັນຍາ 2023 ເພື່ອຜັນຂະຫຍາຍມະຕິ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນໍາພາຂອງພັກ; ແລະ 4. ຜົນສໍາເລັດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກກະຊວງອຸດສາຫະກໍາ ແລະ ການຄ້າ ສະໄໝທີ V.
ສະຫາຍ ນາງ ຈັນສຸກ ແສງພະຈັນ ຮອງເລຂາຄະນະບໍລິຫານງານພັກ-ຮອງລັດຖະມົນຕີກະຊວງ ອຄ. ໄດ້ເຜີຍແຜ່ ປາຖະກະຖາ ວັນຊາດທີ 2 ທັນວາ ຄົບຮອບ 48 ປີ ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 103 ປີ.
ໃນພິທີ ສະຫາຍ ພຸດທະວັນ ນັນທະວົງ ຄະນະປະຈໍາພັກກະຊວງ, ປະທານກວດກາພັກກະຊວງ, ຫົວໜ້າກົມກວດກາ ໃຫ້ກຽດເຜີຍແຜ່ 2 ເນື້ອໃນເອກະສານສຳຄັນຂອງພັກ ຄື: 1. ຄໍາສັ່ງ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023; 2. ຄໍາແນະນໍາການຈັດຕັ້ງປະຕິບັດຄໍາສັ່ງ ຂອງຄະນະບໍລິຫານງານສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 211/ຄຈສພ.
ຂ່າວ-ພາບ: ທ ໄພວັນ ໂຄດວັນທາ ຂ່າວສານ ອຄ.
