ໃນວັນທີ 31 ຕຸລາ 2023 ທີ່ ຫ້ອງປະຊຸມໃຫຍ່ ຊັ້ນ 1 ກະຊວງອຸດສາຫະກຳ ແລະ ການຄ້າ (ອຄ), ນະຄອນຫຼວງວຽງຈັນ, ໄດ້ຈັດ “ ພິທີເປີດການນຳໃຊ້ລະບົບທະບຽນ ແລະ ຄຸ້ມຄອງຖານຂໍ້ມູນ ຜູ້ນຳເຂົ້າ-ສົ່ງອອກ” ໂດຍການເຂົ້າຮ່ວມຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ, ມີທ່ານລັດຖະມົນຕີກະຊວງການເງິນ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ຮອງຜູ້ວ່າທະນາຄານແຫ່ງ ສປປ ລາວ, ຜູ້ຕາງໜ້າບັນດາຂະແໜງ ການທີ່ກ່ຽວຂ້ອງ ແລະ ບໍລິສັດຜູ້ພັດທະນາແອັບເຂົ້າຮ່ວມ.

ທ່ານ ນາງ ມະນີວອນ ວົງໄຊ ຫົວໜ້າກົມການນຳເຂົ້າ ແລະ ສົ່ງອອກ, ກະຊວງ ອຄ ໄດ້ກ່າວໃນງານວ່າ: ວຽກງານການຄຸ້ມຄອງການນຳເຂົ້າ ແລະ ສົ່ງອອກ ເປັນອີກໜຶ່ງວຽກງານບູລິມະສິດ ທີ່ກະຊວງອຸດສາຫະກຳ ແລະ ການຄ້າ ໄດ້ຮັບການມອບໝາຍໃຫ້ເປັນເຈົ້າການສົມທົບກັບພາກສ່ວນກ່ຽວຂ້ອງ ໂດຍສະເພາະ ກະຊວງການເງິນ ແລະ ທະນາຄານແຫ່ງ ສປປ ລາວ ສ້າງ ແລະ ພັດທະນາກົນໄກໃນການຄຸ້ມຄອງຕິດຕາມ ແລະ ເຊື່ອມສານຂໍ້ມູນຂອງສາມພາກສ່ວນໃຫ້ເປັນເອກະພາບກັນ ແນໃສ່ເຮັດໃຫ້ການຄ້າເຂົ້າສູ່ລະບົບ, ຮັບປະກັນການຄຸ້ມຄອງລາຍຮັບ ແລະ ການຊໍາລະເປັນເງິນຕາຈາກການນຳເຂົ້າ ແລະ ສົ່ງອອກສິນຄ້າ, ສົ່ງເສີມການຜະລິດສິນຄ້າພາຍໃນທີ່ມີທ່າແຮງ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ.

ສະນັ້ນ, ຄະນະນຳກະຊວງ ອຸດສາຫະກຳ ແລະ ການຄ້າ ຈຶ່ງໄດ້ມອບໝາຍໃຫ້ກົມການນຳເຂົ້າ ແລະ ສົ່ງອອກ ສົມທົບກັບບໍລິສັດເອກະຊົນທີ່ມີປະສົບການໃນການພັດທະນາລະບົບທັນສະ   ໄໝ ໃຫ້ກັບບັນດາກະຊວງຕ່າງໆ ເພື່ອສ້າງ ແລະ ພັດທະນາລະບົບລົງທະບຽນຜູ້ນຳເຂົ້າ ແລະ ສົ່ງອອກ ທາງເອເລັກໂຕຣນິກຂຶ້ນມາ ຊຶ່ງລະບົບດັ່ງກ່າວຈະຊ່ວຍໃນການຄຸ້ມຄອງຕິດຕາມການນຳເຂົ້າ ແລະ ສົ່ງອອກລວມສູນໃນຂອບເຂດທົ່ວປະເທດ, ການສ້າງຖານຂໍ້ມູນພາກລັດ ແລະ ເປັນການອຳນວຍຄວາມສະດວກໃຫ້ແກ່ຜູ້ປະກອບການ. ລະບົບນີ້ຈະປະກອບສ່ວນໃນການປະຕິບັດວາລະແຫ່ງຊາດ ຂອງລັດຖະບານໃນການເພີ່ມທະວີ ການເກັບລາຍຮັບ ດ້ວຍລະບົບທັນສະໄໝ ແລະ ຫັນການຄຸ້ມຄອງ ພາກລັດໄປສູ່ລະບົບດິຈິຕອນ.           

ພິທີເຊັນບົດບັນທຶກຮ່ວມມື ແລະ  ເປີດການນຳໃຊ້ລະບົບທະບຽນ ແລະ ຄຸ້ມຄອງຖານຂໍ້ມູນ ຜູ້ນຳເຂົ້າ-ສົ່ງອອກ ໃນຄັ້ງນີ້ ຈະເປັນບາດກ້າວໜຶ່ງທີ່ສຳຄັນໃນການຈັດຕັ້ງຜັນຂະຫຍາຍນະໂຍບາຍ ແລະ ລະບຽບການທີ່ວາງອອກໃຫ້ໄດ້ຮັບຜົນສຳເລັດສູງ ໂດຍເພີ່ມທະວີການຮ່ວມມື ລະຫວ່າງ ພາກລັດ ແລະ ເອກະຊົນ ເພື່ອເຮັດໃຫ້ວຽກງານການຄ້າຫັນເຂົ້າສູ່ລະບົບທັນສະໄໝ, ມີຄວາມສະດວກ, ວ່ອງໄວ ແລະ ມີປະສິດທິພາບຍິ່ງຂຶ້ນ. ເຖິງຢ່າງໃດກໍ່ຕາມ ລະບົບດັ່ງກ່າວໃນປັດຈຸບັນ ຍັງເປັນພຽງແຕ່ຂັ້ນເລີ່ມຕົ້ນ ຊຶ່ງຍັງຈະມີການພັດທະນາຕໍ່ໄປ ເພື່ອໃຫ້ໄດ້ຕາມເປົ້າໝາຍທີ່ວາງໄວ້ ກໍຄືເປີດການເຊື່ອມຕໍ່ລະບົບກັບບັນດາຫົວໜ່ວຍທຸລະກິດ ແລະ ຂະແໜງການກ່ຽວຂ້ອງ ເພື່ອໃຫ້ມີຂໍ້ມູນເປັນເອກະພາບກັນ ແລະ ສາມາດຮັບຮອງໄດ້ເຖິງຄວາມຖືກຕ້ອງ ແລະ ໂປ່ງໃສ.

ໃນໂອກາດດຽວກັນ ທ່ານລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ໄດ້ມີຄຳເຫັນ ແລະ ກ່າວຄຳຂອບໃຈບໍລິສັດຜູ້ພັດທະນາລະບົບທີ່ໃຫ້ການສະໜັບສະໜູນໂຄງການດັ່ງກ່າວ ແລະ ຫວັງວ່າບໍລິສັດຍັງຈະສືບຕໍ່ພັດທະນາລະບົບໃນບາດກ້າວຕໍ່ໄປ ຮັບປະກັນຄວາມຍືນຍົງຂອງລະບົບໃຫ້ມີຄວາມສະຖຽນ ແລະ ນຳໃຊ້ຢ່າງມີປະສິດຕິຜົນສູງ.

ຂ່າວ-ພາບ: ທ ໄພວັນ ໂຄດວັນທາ ຂ່າວສານກະຊວງອຸດສາຫະກໍາ ແລະ ການຄ້າ