ຕອນເຊົ້າ ເວລາ 11:45 ໂມງ ຂອງວັນທີ 25 ຕຸລາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າພົບປະຢ້ຽມຂໍ່ານັບ ຂອງ ທ່ານ HU LIANGBO ປະທານກຳມະບານ ຂອງກຸ່ມບໍລິສັດພັດທະນາກະສິກຳຢຸນນານ ສປ ຈີນ ພ້ອມດ້ວຍຄະນະ ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອເປັນການປຶກສາຫາລືໃນວຽກງານການຄ້າ, ກະສິກໍາປຸງແຕ່ງ ແລະ ການລົງທຶນຢູ່ລາວ, ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 18 ທ່ານ.
ໃນໂອກາດພົບປະຄັ້ງນີ້ ແມ່ນເປັນການເສີມຂະຫຍາຍການພົວພັນທີ່ດີ ຂອງສອງປະເທດ, ຊຶ່ງຈະເປັນໂອກາດທີ່ດີ ໃນການປຶກສາຫາລືການຮ່ວມມືຕໍ່ ສປປ ລາວ ໃນດ້ານກະສິກໍາ ລວມທັງການຊຸກຍູ້ສົ່ງເສີມການຄ້າສອງຝ່າຍ ແລະ ການລົງທຶນ ຢູ່ລາວໃຫ້ຫຼາຍຂຶ້ນ; ທັງສອງຝ່າຍໄດ້ປຶກສາຫາລື ກ່ຽວກັບການເສີມຂະຫຍາຍການຮ່ວມມືດ້ານການປຸງແຕ່ງກະສິກໍາ ເປັນຕົ້ນຢາງພາລາ, ສາລີ, ມັນຕົ້ນ, ຖົ່ວເຫຼືອງ; ຂະຫຍາຍເນື້ອທີ່ການປູກຝັງກະສິກໍາ ໂດຍສະເພາະການນໍາເຂົ້າແນວພັນທີ່ດີຂອງບໍລິສັດ ເພື່ອເພີ່ມສະມັດຕະພາບຂອງຜົນຜະລິດ; ການຊື້ກາເຟ ເປັນຕົ້ນການລົງທຶນກ່ຽວກັບກາເຟ ຈາກຟາມ ເຖິງ ໂຮງງານປຸງແຕ່ງ; ຄົ້ນຄວ້າຄວາມເປັນໄປໄດ້ໃນການຖືຫຸ້ນ ໃນລັດວິສາຫະກິດ ກາເຟດາວ; ໜັງສືສະເໜີມາດຕະຖານຢາງພາລາ ຂອງບໍລິສັດທີ່ໄດ້ປູກ ແລະ ປຸງແຕ່ງເພື່ອສົ່ງອອກໄປ ຈີນ, ແຜນສ້າງໂຮງງານຜະລິດຫົວອາຫານຢູ່ລາວ, ສາງຮອງຮັບສິນຄ້າກະສິກໍາເພື່ອສົ່ງອອກ ຕາມແລວທາງລົດໄຟລາວ-ຈີນ ແລະ ອື່ນໆ ພ້ອມທັງຊອກຫາວິທີການຮ່ວມທຸລະກິດນຳກັນ ໃຫ້ນັບມື້ນັບເພີ່ມຂຶ້ນ.
ທ່ານ HU LIANGBO ສະແດງຄວາມຂອບໃຈ ທີ່ທ່ານລັດຖະມົນຕີ ໄດ້ໃຫ້ການຕ້ອນຮັບ ແລະ ການແລກປ່ຽນຄໍາຄິດເຫັນທີ່ດີ ຊຶ່ງເຫັນໄດ້ສະຖານະພາບການພັດທະນາຂອງປະເທດລາວ, ພ້ອມທັງສະເໜີ ຂໍການສະໜັບສະໜູນຈາກລັດຖະບານລາວ, ການເຊື້ອເຊີນທ່ານລັດຖະມົນຕີ ພ້ອມຄະນະ ໄປຢ້ຽມຢາມກຸ່ມບໍລິສັດໃນເວລາທີ່ເໝາະສົມ ແລະ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ໃນວຽກງານຫຼາຍດ້ານ ລະຫວ່າງ ສປປ ລາວ – ຈີນ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ.
ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈ ແລະ ຫວັງວ່າໃນຕໍ່ໜ້າທາງກຸ່ມບໍລິສັດຈະລົງທຶນໃນດ້ານກະສິກໍາປຸງແຕ່ງໃນລາວເພີ່ມຂຶ້ນ ຊຶ່ງລັດຖະບານລາວໄດ້ຖືເປັນບູລິມະສິດໃນການພັດທະນາສິນຄ້າຂອງລາວ ເພື່ອສົ່ງອອກ, ພ້ອມທັງອວຍພອນໄຊ ຕໍ່ທ່ານ HU LIANGBO ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຊີວິດຄອບຄົວ ແລະ ປະສົບຜົນສໍາເລັດໃນໜ້າທີ່ການງານໃນໄລຍະມາເຄື່ອນໄຫວວຽກງານຢູ່ ສປປ ລາວ.
ພາບ-ຂ່າວ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ
