ໃນວັນທີ 12 ຕຸລາ 2023, ທີ່ຫ້ອງປະຊຸມສະພາປະຊາຊົນແຂວງ, ໄດ້ຈັດພິທີ ປະກາດຍົກຍ້າຍ, ແຕ່ງຕັ້ງ ຫົວໜ້າພະແນກ ອຸດສາຫະກໍາ ແລະ ການຄ້າ ແຂວງ ແລະ ຫົວໜ້າພະແນກ ພະລັງງານ ແລະ ບໍ່ແຮ່ ແຂວງອັດຕະປື ຜູ້ໃໝ່, ໂດຍການປະທານຂອງ ທ່ານ ບຸນເສີດ ເສດທິລາດ ຮອງເຈົ້າແຂວງແຂວງອັດຕະປື, ມີພະນັກງານ ການນໍາ ພາກສ່ວນກ່ຽວຂ້ອງຂອງແຂວງເຂົ້າຮ່ວມ.

ໃນພິທີປະກາດການຍົກຍ້າຍ, ແຕ່ງຕັ້ງ ຫົວໜ້າພະແນກ ຜູ້ເກົ່າ ແລະ ຜູ້ໃໝ່ ໄດ້ຜ່ານຂໍ້ຕົກລົງ ຂອງເຈົ້າແຂວງແຂວງອັດຕະປື ສະບັບເລກທີ 1328/ຈຂອປ, ລົງວັນທີ 11 ຕຸລາ 2023 ວ່າດ້ວຍການຍົກຍ້າຍ ທ່ານ ສຸດໃຈ ກົມມະເມືອງ ຫົວໜ້າພະແນກອຸດສາຫະກໍາ ແລະ ການຄ້າ ແຂວງ ໄປເປັນຫົວໜ້າພະແນກພະລັງງານ ແລະ  ບໍ່ແຮ່  ຄົນໃໝ່ ແລະ ຂໍ້ຕົກລົງ ສະບັບເລກທີ 1330/ຈຂອປ, ລົງວັນທີ 11 ຕຸລາ 2023 ວ່າດ້ວຍການແຕ່ງຕັ້ງ ທ່ານ ສິດຕິໄຊ ສີລີໄຊ ຮອງຫົວໜ້າພະແນກ ອຸດສາຫະກໍາ ແລະ ການຄ້າ ແຂວງ ຂື້ນເປັນຮັກສາການແທນຫົວໜ້າພະແນກ ອຸດສາຫະກໍາ ແລະ ການຄ້າ ແຂວງ ຜູ້ໃໝ່.

ໃນພິທີຍັງໄດ້ເຊັນບົດບັນທຶກມອບຮັບໜ້າທີ່ໃໝ່ຢ່າງເປັນທາງການ ຕໍ່ໜ້າພາກສ່ວນກ່ຽວຂອງເຂົ້າຮ່ວມ, ໂອກາດນີ້ ຍັງໄດ້ຮັບຟັງການໂອລົມໃຫ້ທິດຊີນໍາຂອງທ່ານປະທານ ວ່າ: ການປະ ກາດ ແຕ່ງຕັ້ງ, ຍົກຍ້າຍ ຄັ້ງນີ້ແມ່ນອີງໃສ່ຄວາມຮຽກຮ້ອງຕ້ອງການ ແບບພາວະວິໃສຂອງຄວາມເປັນຈິງໃນຍຸກການປ່ຽນແປງໃໝ່ ເວົ້າລວມແລ້ວກໍເພື່ອຍົກສູງບົດບາດການນໍາພາ ຂອງຂະແໜງ ການໃຫ້ມີຜົນສໍາເລັດອັນໃໝ່, ພ້ອມນີ້ ທ່ານຍັງໄດ້ເນັ້ນ ໃຫ້ຜູ້ທີ່ຖືກແຕ່ງຕັ້ງ  ໃໝ່ ຄັ້ງນີ້ໃຫ້ສືບຕໍ່ຍົກບົດບາດການນໍາພາ, ເພີ່ມທະວີຄວາມສາມັກຄີໃນໝູ້ຄະນະໃຫ້ໜັກແໜ້ນ ແບ່ງວຽກໃຫ້ບຸກຄົນຮັບຜິດຊອບຢ່າງຈະແຈ້ງ ພ້ອມທັງສູ້ຊົນການນໍາພາໃຫ້ມີຜົນສໍາເລັດ.

ຂໍ້ມູນຂ່າວ ແລະ ພາບ: ພະແນກອຸດສາຫະກໍາ ແລະ ການຄ້າ ແຂວງອັດຕະປື

ຮຽບຮຽງລົງຂ່າວ: ໄພວັນ ໂຄດວັນທາ, ອະຊວງ ອຄ