ຕອນເຊົ້າ ວັນທີ 7 ມິຖຸນາ 2023 ທີ່ຫ້ອງຮັບແຂກ ກະຊວງອຸດສາຫະກໍາ ແລະ ການຄ້າ, ທ່ານ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຕ້ອນຮັບການເຂົ້າຢ້ຽມ ແລະ ພົບປະ ຂອງທ່ານ ຫມາ ນິງຢີ້ (Ma Ningyu) ເຈົ້າເມືອງ ກຸ້ຍຢາງ ເມືອງຫລວງ ຂອງ ແຂວງກຸ້ຍໂຈ, ແຫ່ງ ສປ ຈີນ ພ້ອມດ້ວຍຄະນະ, ເນື່ອງໃນໂອກາດການເຂົ້າຢ້ຽມພົບປະຄັ້ງນີ້ ເພື່ອປຶກສາຫາລື ການຮ່ວມມືທາງດ້ານເສດຖະກິດ, ການຄ້າ ແລະ ອຸດສາຫະກຳ ລະຫວ່າງ ສປປ ລາວ ແລະ ແຂວງກຸ້ຍໂຈ ໃນຕໍ່ໜ້າ, ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 13 ທ່ານ.
ໂອກາດນີ້ທ່ານ ຮອງລັດຖະມົນຕີ ກະຊວງ ອຄ ໄດ້ກ່າວຕ້ອນຮັບດ້ວຍຄວາມຈິງໃຈ ຕໍ່ຄະນະຂອງທ່ານເຈົ້າເມືອງ ກຸ້ຍຢາງ ເມືອງຫລວງ ຂອງ ແຂວງກຸ້ຍໂຈ ແຫ່ງ ສປ ຈີນ ທີ່ໃຫ້ກຽດມາຢ້ຽມຢາມ ແລະ ພົບປະຄັ້ງນີ້ຢ່າງອົບອຸ່ນ, ການພົບປະຄັ້ງນີ້ທັງສອງຝ່າຍໄດ້ປຶກາຫາລືຮ່ວມກັນ ກ່ຽວກັບການຮ່ວມມືສອງຝ່າຍ, ຊຸກຍູ້ ແລະ ສົ່ງເສີມການຄ້າ-ການລົງທຶນ ແລະ ການຄ້າຊາຍແດນ ລາວ-ຈີນ, ການພັດທະນາອຸດສາຫະກຳ ແລະ ອຳນວຍຄວາມສະດວກໃນການຂົນສົ່ງສິນຄ້າ ຜ່ານທາງລົດໄຟ ລາວ-ຈີນ ຕໍ່ ເອີຣົບ.
ນອກນັ້ນທັງສອງຍັງແລກປ່ຽນ ຂໍການສະໜັບສະໜູນ ວຽກງານສົ່ງເສີມການຄ້າ ເປັນຕົ້ນວຽກງານວາງສະແດງສິນຄ້າ ແລະ ວຽກງານອຳນວຍຄວາມສະດວກທາງດ້ານການຄ້າ ເປັນຕົ້ນການຂົນສົ່ງສິນຄ້າຜ່ານທາງລົດໄຟ; ເພື່ອດືງດູດການລົງທືນຈາກ ສປ ຈີນ ແລະ ບັນດາປະເທດຕ່າງໆ ໃຫ້ຫລາຍຂື້ນໃນອະນາຄົດ, ສະເຫນີໃຫ້ມີການຈັດກິດຈະກຳສຳມະນາ ຫລື ເວທີພົບປະໃດຫນື່ງລະຫວ່າງພາກທຸລະກິດຂອງສອງຝ່າຍ, ເພື່ອເປັນເວທີ ແລະ ຊ່ອງທາງໃນການສົ່ງເສີມການຄ້າ ແລະ ການລົງທືນ, ການອຳນວຍຄວາມສະດວກທາງດ້ານການຄ້າ ແລະ ການລົງທືນ, ການສ້າງຕ່ອງໂສ້ມູນຄ່າເພີ່ມໃນລະດັບພາກພື້ນ ແລະ ສາກົນ, ການສົ່ງເສີມການຄ້າເອເລັກໂຕຣນິກ ແລະ ອື່ນໆ; ແລະ ຮ່ວມກັນສ້າງກົນໄກປະສານງານລະຫວ່າງ ສປປ ລາວ ແລະ ແຂວງ ກຸ້ຍໂຈ.
ໂອກາດພົບປະຄັ້ງນີ້ ທ່ານ ຫມາ ນີງຢີ້, ເຈົ້າເມືອງ ກຸ້ຍຢາງ ສະແດງຄວາມຂອບໃຈຕໍ່ ທ່ານຮອງລັດຖະມົນຕີກະຊວງອຸດສາຫະກໍາ ແລະ ກາຄ້າ ທີ່ໃຫ້ກຽດຕ້ອນຮັບ ແລະ ອວຍພອນໄຊໃຫ້ທ່ານຈົ່ງປະສົບຜົນສຳເລັດໃນການປະຕິບັດວຽກງານ ແລະ ຫນ້າທີ່ການງານທຸກປະການ.
ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
