ເພື່ອເປັນການສະຫຼຸບຖອດຖອນບົດຮຽນການຈັດຕັ້ງປະຕິບັດວຽກງານຜ່ານມາ ຕິດພັນກັບການຊຸກຍູ້ສົ່ງເສີມວຽກດີຄົນເດັ່ນ, ສ້າງຂະບວນການແຂ່ງຂັນທີ່ກ້າວໜ້າ ມີຄວາມທັນສະໄໝ ຕາມທິດສີຂຽວ ແລະ ຍືນຍົງ. ກະຊວງ ອຄ ໄດ້ຈັດພິທີສະຫຼຸບ ແລະ ເປີດຂະບວນການວຽກງານແຂ່ງຂັນ-ຍ້ອງຍໍ, ຮັກຊາດ ແລະ ພັດທະນາ 5 ປີ (2016-2020) ແລະ ທິດທາງແຜນການຮອດປີ 2025.
ພິທີດັ່ງກ່າວຈັດຂຶ້ນໃນວັນທີ 28 ກຸພາ 2023 ທີ່ຫ້ອງປະຊຸມ ກະຊວງອຸດສາຫະກຳ ແລະ ການຄ້າ (ອຄ) ພາຍໃຕ້ການເປັນປະທານຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ; ມີບັນດາທ່ານຮອງລັດທະມົນຕີ, ພະນັກງານອາວຸໂສບຳນານ, ຫ້ອງການ, ບັນດາກົມກອງອ້ອມຂ້າງກະຊວງ ຕະຫຼອດຮອດຜູ້ປະກອບການລັດວິສາຫະກິດ-ບໍລິສັດ ແລະ ພະນັກງານຫຼັກແຫຼ່ງຂອງບັນດາກົມກອງ ອ້ອມຂ້າງກະຊວງ ເຂົ້າຮ່ວມ.
ທີ່ປະຊຸມປະຊຸມໄດ້ມີການລາຍງານ ການຈັດຕັ້ງປະຕິບັດວຽກງານແຂ່ງຂັນ-ຍ້ອງຍໍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ 2016-2020. ພ້ອມຍັງໄດ້ຂຶ້ນຜ່ານລັດຖະດຳລັດວ່າດ້ວຍການປະດັບຫຼຽນໄຊ, ຫຼຽນກາແຮງງານ, ໃບຍ້ອງຍໍລັດຖະບານ ແລະ ຂໍ້ຕົກລົງຂອງລັດຖະມົນຕີກະຊວງອຸດສາຫະກຳ ແລະ ການຄ້າ ວ່າດ້ວຍການມອບໃບຍ້ອງຍໍ ແລະ ໃບຊົມເຊີຍ ໃນຜົນງານ 5 ປີ (2016-2020) ຕາມດ້ວຍມີພິທີປະດັບຫຼຽນໄຊ ແລະ ມອບໃບຍ້ອງຍໍ ໃຫ້ແກ່ກົມກອງລວມມູ່ ແລະ ບຸກຄົນດີເດັ່ນ.
ໃນໄລຍະປິດທ້າຍພິທີທ່ານ ມະໄລທອງ ກົມມະສິດ ໄດ້ມີຄຳເຫັນວ່າ: ກອງປະຊຸມສະຫຼຸບວຽກງານແຂ່ງຂັນ ຮັກຊາດ ແລະ ພັດທະນາ ຂອງກະຊວງ ອຸດສາຫະກຳ ແລະ ການຄ້າ ໃນຄັ້ງນີ້ຖືເປັນບັ້ນສະຫຼຸບຕີລາຄາຄືນໝາກຜົນຕົວຈິງໃນການຜັນຂະຫຍາຍ ແລະ ຈັດຕັ້ງປະຕິບັດມະຕິຕົກລົງ ຂອງກົມການເມືອງສູນກາງພັກ ວ່າດ້ວຍ ການເພີ່ມທະວີວຽກງານແຂ່ງຂັນ-ຍ້ອງຍໍ ໃນໄລຍະໃໝ່ ກໍຄືການຈັດຕັ້ງປະຕິບັດມະຕິຂອງກອງປະຊຸມໃຫຍ່ຜູ້ແທນຂອງອົງຄະນະພັກ ກະຊວງ ອຸດສາຫະກຳ ແລະ ການຄ້າ ຄັ້ງທີ IV ຕໍ່ໃສ່ສະໄໝທີ V, ພ້ອມທັງກຳນົດທິດທາງແຜນການ ແຕ່ນີ້ຮອດປີ 2025 ເພື່ອປະເມີນຄືນຮອບດ້ານທີ່ບັນດາກົມກອງລວມໝູ່ ແລະ ບຸກຄົນສະມາຊິກພັກ-ພະນັກງານ ທີ່ສາມາດຈັດຕັ້ງປະຕິບັດໄດ້ ແລະ ບັນຫາທີ່ຍັງຄົງຄ້າງ ແນໃສ່ເຮັດໃຫ້ຂະບວນການແຂ່ງຂັນ ຮັກຊາດ ແລະ ພັດທະນາ ໄດ້ຮັບການປັບປຸງ, ຍົກລະດັບຢ່າງໜັກແໜ້ນ, ກວ້າງຂວາງ ແລະ ໄດ້ຮັບໝາກຜົນຕົວຈິງຫຼາຍຂຶ້ນກວ່າເກົ່າ. ຂໍສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນຂະບວນການແຂ່ງຂັນ ຮັກຊາດ ແລະ ພັດທະນາ ໃນໄລຍະປີ 2016-2020. ຜົນສຳເລັດທີ່ຍາດມາໄດ້ນັ້ນ ໄດ້ເກີດມີບັນດາໜໍ່ແໜງໃໝ່ ແລະ ປັດໃຈໃໝ່, ການສ້າງທ່ວງທ່າ ແລະ ກໍາລັງແຮງທີ່ເປັນພື້ນຖານໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ເຂັ້ມແຂງຍິ່ງໆຂຶ້ນ.
ພາບ ແລະ ຂ່າວ ໂດຍ ໄພຄຳອີ ວິໄລຄຳ
