ໃນວັນທີ 2-4 ກຸມພາ 2023 ຫວ່າງບໍ່ດົນມານີ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ເຂົ້າຮ່ວມງານບຸນມະໂຫລານ ກາເຟ-ຊາ ແລະ ຜົນຜະລິດກະສິກໍາພູພຽງບໍລະເວນ ປະຈໍາປີ 2023 ທີ່ແຂວງຈໍາປາສັກ ຮ່ວມກັບ ພະແນກອຸດສາຫະກໍາ ແລະ ການຄ້າແຂວງ, ມີຄະນະພັກ-ອົງການປົກຄອງເມືອງປາກຊ່ອງ ແລະ ສະມາຄົມກາເຟລາວ ໄດ້ຈັດງານບຸນມະໂຫລານກາເຟ ແລະ ຊາ ພູພຽງບໍລະເວນ ປະຈໍາປີ 2023. ພິທີເປີດງານຢ່າງເປັນທາງການ ຈັດຂຶ້ນໃນວັນທີ 02 ກຸມພາ 2023 ຢູ່ຕະຫຼາດສະບາຍດີປາກຊ່ອງ ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ ຮອງປະທານປະເທດແຫ່ງ ສປປ ລາວ, ທ່ານ ສົມມາດ ພົນເສນາ ກໍາມະການສູນກາງພັກ ຮອງປະທານສະພາແຫ່ງຊາດ, ທ່ານ ປອ. ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ປະທານຈັດງານ, ທ່ານ ປອ.ດຣ.ບຸນແຝງ ພູມມະໄລສິດ ກໍາມະການສູນກາງພັກ ລັດຖະມົນຕີ ກະຊວງສາທາລະນະສຸກ, ທ່ານ ກິແກ້ວ ສີງນາວົງ ຮອງລັດຖະມົນຕີກະຊວງກະສິກຳ- ປ່າໄມ້, ບັນດາທ່ານ ການນໍາແຂວງພາກກາງ, ພາກໃຕ້ ສສ ຫວຽດນາມ, ການນໍາແຂວງຊຽງແຕງ, ແຂວງພາວິເຮຍ ຣາຊະອານາຈັກກໍາປູເຈຍ ແລະ ການນໍາຈັງຫວັດອຸບົນຣາຊະທານີ ຣາຊະອານາຈັກໄທ, ບັນດາທ່ານຮອງເຈົ້າແຂວງ, ຫົວໜ້າກົມ, ຮອງຫົວໜ້າກົມ ຈາກກະຊວງທີ່ກ່ຽວຂ້ອງ, ຫົວໜ້າພະແນກ-ຮອງຫົວໜ້າພະແນກອຸດສາຫະກໍາ ແລະ ການຄ້າ ໃນທົ່ວປະເທດ, ທຸຕານຸທູດ, ບັນດາທ່ານຄະນະນໍາແຂວງ, ເມືອງ ແລະ ພະແນກການກົມອ້ອມຂ້າງແຂວງ, ອົງການຈັດຕັ້ງສາກົນ, ປະທານ ແລະ ສະມາຊິກສະມາຄົມກາເຟລາວ, ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ປະທານສະພາການຄ້າ ແລະ ອຸດສາຫະກໍາແຂວງ, ນັກທຸລະກິດ, ຜູ້ປະກອບການ ຫົວໜ່ວຍວິສາຫະກິດ, ສະມາຄົມ, ສະຫະກອນຜູ້ຜະລິດກາເຟ-ຊາ ຢູ່ໃນເຂດພູພຽງບໍລະເວນ ແລະ ເມືອງປາກຊ່ອງ ຕະຫຼອດຮອດຄະນະພັກ-ອົງການການປົກຄອງ, ພະນັກງານ, ພໍ່ ແມ່ປະຊາຊົນເມືອງປາກຊ່ອງເຂົ້າຮ່ວມ ຢ່າງຫຼວງຫຼາຍ.
ໃນງານມີການວາງສະແດງກ່ຽວກັບ ກາເຟ-ຊາ ແລະ ສິນຄ້າອື່ນໆທີ່ເປັນທ່າແຮງຂອງແຂວງ, ຂອງເມືອງປາກຊ່ອງ. ນອກນີ້ ຍັງມີການແຂ່ງຂັນການຊົງກາເຟທີ່ເປັນເອກກະລັກ, ມີແຂ່ງຂັນກິລາ ແລະ ສີນລະປະ, ມີການວາງສະແດງຮູບພາບວັດທະນະທໍາທີ່ເປັນເອກກະລັກ ພາຍໃຕ້ຫົວຂໍ້ ວັດທະນະທໍາກາເຟ ທີີ່ເປັນເອກກະລັກທ້ອງຖິ່ນ, ການທ່ອງທ່ຽວສຶກສາເຂດປູກ – ຜະລິດກາເຟ.
ໃນງານດັ່ງກ່າວໄດ້ມີຫົວໜ່ວຍທຸລະກິດເຂົ້າຮ່ວມວາງສະແດງ ແລະ ຈໍາໜ່າຍສິນຄ້າ 34 ຫົວໜ່ວຍ, ລວມມີ 58 ຫ້ອງ, ປະກອບມີ ຫົວໜ່ວຍກຸ່ມຜູ້ຜະລິດເມືອງປາກຊ່ອງ, ສະຫະກອນກາເຟ-ຊາ, ບໍລິສັດເກັບຊື້ ແລະ ສົ່ງອອກກາເຟ, ສະມາຄົມກາເຟ, ສະມາຄົມຫັດຖະກໍາ, ໂຮງງານອຸດສາຫະກໍາປຸງແຕ່ງ, ທະນາຄານທຸລະກິດ, ທຸລະກິດຈໍາໜ່າຍພາຫະນະ, ກຸ່ມຜະລິດສິນຄ້າໜຶ່ງເມືອງໜຶ່ງຜະລິດຕະພັນ (ODOP), ຜູ້ຈໍາໜ່າຍຜະລິດຕະພັນກາເຟ ພາຍໃນແຂວງ, ຕ່າງແຂວງ ແລະ ພາກສ່ວນຕ່າງປະເທດ.ສິນຄ້າທີ່ນໍາເຂົ້າມາວາງສະແດງ ແລະ ຈໍາໜ່າຍ ປະກອບດ້ວຍ ຜະລິດຕະພັນກະສິກໍາ ແລະ ອຸດສາຫະກໍາປຸງແຕ່ງ ເປັນຕົ້ນແມ່ນຜະລິດຕະພັນກາເຟ, ຊາ, ພືດຜັກ, ເຄື່ອງຫັດຖະກໍາຈັກສານ ໄມ້ປ່ອງ – ຫວາຍ, ຜ້າຝ້າຍ, ຜ້າໄໝ, ການໂຄສະນາແຫຼ່ງທ່ອງທ່ຽວ, ພາຫະນະ ແລະ ສິນຄ້າປະເພດຕ່າງໆ ທີ່ທາງອົງການປົກຄອງເມືອງປາກຊ່ອງ ໄດ້ຊຸກຍູ້ເຂົ້າມາຮ່ວມງານ ຈໍານວນ 100 ຮ້ານ. ມູນຄ່າສິນຄ້າທີ່ນໍາເຂົ້າມາວາງສະແດງ ແລະ ຈໍາໜ່າຍໃນງານ ປະມານ 5 ຕື້ກີບ, ຄາດຄະເນຈະມີເງິນໝູນວຽນໃນແຕ່ລະວັນ ປະມານ 11,5 ຕື້ກີບ. ໃນງານ ຍັງມີກອງປະຊຸມສາກົນ ເພື່ອສົ່ງເສີມການຄ້າ-ການລົງທຶນ ທັງເປັນການເຜີຍແຜ່ແນວທາງນະໂຍບາຍ ແລະ ຍຸດທະສາດການພັດທະນາກາເຟລາວ ໃຫ້ຍືນຍົງ ແລະ ຂະຫຍາຍຕົວ.
ຈຸດປະສົງໃນການຈັດງານຄັ້ງນີ້ ກໍເພື່ອເປັນການສືບຕໍ່ຈັດຕັັ້ງປະຕິບັດແຜນພັດທະນາເສດຖະກິດ – ສັງຄົມຂອງແຂວງ ກໍຄືແຜນພັດທະນາວຽກງານຂະແໜງອຸດສາຫະກໍາປຸງແຕ່ງ ແລະ ການຄ້າ 5 ປີ ຄັັ້ງທີ IX ຂອງແຂວງຈໍາປາສັກ ໃນການຊຸກຍູ້ສົົ່ງເສີມການຜະລິດເປັນສິນຄ້າຢູ່ພາຍໃນໃຫ້ເຂັັ້ມແຂງ ທັງເປັນການສືບຕໍ່ຜັນຂະຫຍາຍໂຄງການງານບຸນກາເຟ-ຊາ ພູພຽງບໍລະເວນ ໃນແຕ່ລະປີ ຕິດພັນກັບການສົົ່ງເສີມດ້ານການຕະຫຼາດ ໃຫ້ໄດ້ຮັບການຈັດຕັັ້ງປະຕິບັດຢ່າງເປັນລະບົບຕໍ່ເນື່ອງ ແລະ ກາຍເປັນບຸນປະເພນີຂອງແຂວງ, ເປັນການໂຄສະນາເຄື່່ອງໝາຍການຄ້າກາເຟແຂວງຈໍາປາສັກ, ພັດທະນາກາເຟຄຸນນະພາບສູງ, ປະກອບສ່ວນຍົກລະດັບຄຸນຄ່າ ແລະ ຢັ້ງຢືນເຖິງຖານະບົດບາດກາເຟຂອງແຂວງຈໍາປາສັກ ຢູ່ໃນເວທີພາຍໃນ ແລະ ຕະຫຼາດໂລກ ທັງເປັນການຍົກສູງ, ເຊີດຊູຜູ້ປູກ, ປຸງແຕ່ງ ແລະ ຜູ້ດໍາເນີນທຸລະກິດກາເຟ, ປຸກລະດົມການມີສ່ວນຮ່ວມ ໃນການພັດທະນາການປູກ ແລະ ຂະບວນການຜະລິດກາເຟ ຢູ່ ສປປ ລາວ ເວົ້າລວມ, ເວົ້າສະເພາະ ຢູ່ເຂດທ້ອງຖິ່ນແຂວງຈໍາປາສັກ. ນອກນີ້ກໍເພື່ອນໍາສະເໜີຮູບພາບທີີ່ເປັນເອກກະລັກກ່ຽວກັບວັດທະນະທໍາກາເຟ ທີີ່ຕິດພັນຄຽງຄູ່ກັບຄົນລາວເຮົາ, ບັນດາພື້ນຖານ, ທ່າແຮງ ແລະ ການທ່ອງທ່ຽວ, ດຶງດູດບັນດານັກລົງທຶນ, ນັກທ່ອງທ່ຽວພາຍໃນ ແລະ ຕ່າງປະເທດ ທີ່ເດີນທາງເຂົ້າມາຢ້ຽມຢາມທ້ອງຖິ່ນແຂວງຈໍາປາສັກ ທັງເປັນການແລກປ່ຽນບັນດາມາດຕະການ ໃນການຈັດຕັ້ງປະຕິບັດ ການເຊື່ອມໂຍງການຄ້າ ແລະ ວິທີການພັດທະນາຂະບວນການຜະລິດຕ່າງໆ.
ແຫຼ່ງຂ່າວຈາກ: ໜັງສືພິມຈໍາປາໃໝ່
ພາບ: ນ ໄພວອນ ວົງສົມມີ
ຮຽບຮຽງ: ທ ໄພວັນ ໂຄດວັນາທາ
