ໃນວັນທີ 02 ກຸມພາ 2023, ທີ່ນະຄອນຫຼວງວຽງຈັນ, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມສະເຫຼີມສະຫຼອງການເຂົ້າເປັນສະມາຊິກອົງການການຄ້າໂລກ (ອຄລ) ຂອງ ສປປ ລາວ ຄົບຮອບ 10 ປີ ໂດຍການເຂົ້າຮ່ວມ ແລະ ກ່າວເປີດໂດຍ ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ Xiangchen Zhang, ຮອງຜູ້ອໍານວຍການໃຫຍ່ ອຄລ ເເລະ ທ່ານ Li Fei, ຜູ້ຊ່ວຍ ລັດຖະມົນຕີ ກະຊວງການຄ້າ ສປ ຈີນ. ກອງປະຊຸມສະເຫຼີມສະຫຼອງການເຂົ້າເປັນສະມາຊິກ ອຄລ ຂອງ ສປປ ລາວ ຄົບຮອບ 10 ປີ ໃນຄັ້ງນີ້ ໄດ້ຈັດຂຶ້ນຄຽງຄູ່ກັບກອງປະຊຸມໂຕະມົນຄັ້ງທີ 11 ຂອງ ອຄລ (11th China Round Table) ຊຶ່ງມີບັນດາລັດຖະມົນຕີທີ່ຮັບຜິດຊອບຊີ້ນຳວຽກຂົງເຂດເສດຖະກິດເຂົ້າຮ່ວມແບບເຊິ່ງໜ້າ ແລະ ທາງໄກ ຈາກປະເທດ: ຊູດັງ, ຕິມໍແລັດສະເຕ ແລະ ວານູອາຕູ, ສະມາຊິກ ອຄລ ຈຳນວນໜຶ່ງ ແລະ ປະເທດທີ່ກຳລັງສະໝັກເຂົ້າເປັນສະມາຊິກ ອຄລ, ພ້ອມທັງແຂກພາຍໃນຈາກບັນດາກະຊວງຂະແໜງການທັງພາກລັດ ແລະ ທຸລະກິດ ເຂົ້າຮ່ວມທັງໝົດ ຈຳນວນ 120 ທ່ານ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອທົບທວນຄືນໝາກຜົນ 10 ປີ ທີ່ ສປປ ລາວ ຍາດມາໄດ້ພາຍຫຼັງການເຂົ້າເປັນສະມາຊິກ ອຄລ; ພ້ອມດຽວກັນ, ກອງປະຊຸມ ກໍຍັງເປັນເວທີສົນທະນາແລກປ່ຽນຄໍາຄິດຄໍາເຫັນ ລະຫວ່າງພາກລັດ ແລະ ທຸລະກິດ ລວມທັງອົງການຈັດຕັ້ງສາກົນ ກ່ຽວກັບກາລະໂອກາດ, ສິ່ງທ້າທາຍ ແລະ ທິດທາງໃນຕໍ່ໜ້າ ໃນການກຳນົດນະໂຍບາຍການຄ້າ, ສ້າງເງື່ອນໄຂ ແລະ ສິ່ງແວດລ້ອມ ທີ່ເອື້ອອໍານວຍໃຫ້ແກ່ການດຳເນີນທຸລະກິດ ແລະ ສົ່ງເສີມການຄ້າ.
ດັ່ງທີ່ ທ່ານ ທອງລຸນ ສີສຸລິດ, ອະດີດຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ໃນເວລານັ້ນ ໄດ້ກ່າວວ່າ: “ຫຼັກການຂອງ ອຄລ ເປັນຫຼັກການທີ່ລັດຖະບານ ສປປ ລາວ ໄດ້ຮັບຮອງ ກໍຄື ລະບົບການຄ້າຫຼາຍຝ່າຍທີ່ຮັບປະກັນວ່າ ການເຊື່ອມໂຍງທາງດ້ານເສດຖະກິດຈະຢູ່ບົນພື້ນຖານຂອງຄວາມເປັນທຳ ແລະ ສາມາດຄາດຄະເນໄດ້, ຊຶ່ງເປັນສິ່ງສໍາຄັນທີ່ສຸດສໍາລັບ ສປປ ລາວ ກໍຄືປະເທດທີ່ບໍ່ມີຊາຍແດນຕິດກັບທະເລ, ເປັນປະເທດນ້ອຍ ແລະ ດ້ອຍພັດທະນາ. ດັ່ງນັ້ນ, ສປປ ລາວ ຈະພະຍາຍາມເພື່ອປະກອບສ່ວນເຂົ້າໃນວຽກງານຂອງ ອຄລ. ແຕ່ເຖິງ ຢ່າງໃດກໍຕາມ ສປປ ລາວ ເຫັນວ່າຕ້ອງມີການປະຕິບັດຕາມລະບຽບການ ແລະ ພັນທະຂອງ ອຄລ ໂດຍຜ່ານການເຂົ້າຮ່ວມຢ່າງຕັ້ງໜ້າໃນເວທີເຈລະຈາ.
ໝາກຜົນ 10 ປີ ຂອງການເຂົ້າເປັນສະມາຊິກ ອຄລ ທີ່ດໍາເນີນໄປຄຽງຄູ່ກັບການປັບປຸງບັນດານິຕິກຳໃຫ້ມີຄວາມໂປ່ງໃສ ແລະ ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການດຳເນີນທຸລະກິດ ໄດ້ສ້າງໂສມໜ້າໃໝ່ໃຫ້ແກ່ການພັດທະນາເສດຖະກິດ-ສັງຄົມ ຂອງ ສປປ ລາວ, ໂດຍສະເພາະ ແມ່ນໄດ້ເຮັດໃຫ້ຫຼາຍຕົວຊີ້ວັດຂອງການພັດທະນາເສດຖະກິດ ໄດ້ຮັບການປັບປຸງດີຂຶ້ນ ເປັນຕົ້ນ: ລວມຍອດຜະລິດຕະພັນພາຍໃນ, ລາຍຮັບສະເລ່ຍຕໍ່ຫົວຄົນ, ການລົງທຶນໂດຍກົງຈາກຕ່າງປະເທດ, ການຜະລິດພາຍໃນ, ການນໍາເຂົ້າ-ສົ່ງອອກ ແລະ ຕົວຊີ້ວັດອື່ນໆ ເຊັ່ນ: ອັດຕາການເພີ່ມຂຶ້ນຂອງ GDP ສະເລ່ຍແມ່ນ 7%-8%; ລາຍຮັບສະເລ່ຍຕໍ່ຫົວຄົນແມ່ນເພີ່ມຂຶ້ນ 46% ໃນລະຫວ່າງປີ 2008 ແລະ 2021; ການສົ່ງອອກເພີ່ມຂຶ້ນຫຼາຍກວ່າ 4 ເທົ່າ, ການນຳເຂົ້າເພີ່ມຂຶ້ນຫຼາຍກວ່າ 3 ເທົ່າ ແລະ ການລົງທຶນໂດຍກົງຈາກຕ່າງປະເທດ ແມ່ນມີທິດທາງຂະຫຍາຍຕົວໄປໃນທາງບວກ ຈາກ 0,28 ຕື້ໂດລາສະຫະລັດໃນປີ 2010 ມາເປັນ 0,97 ຕື້ໂດລາສະຫະລັດ ໃນປີ 2020 ຊຶ່ງເຮັດໃຫ້ ສປປ ລາວ ສາມາດເປັນສ່ວນໜຶ່ງຂອງຕ່ອງໂສ້ການຜະລິດ ແລະ ການສະໜອງຂອງພາກພື້ນ ແລະ ສາກົນ.
ຂ່າວ-ພາບ: ທ ໄພວັນ ໂຄດວັນທາ
