ຕອນບ່າຍຂອງວັນທີ 18 ມິຖຸນາ 2025 ທີ່ຫໍປະຊຸມແຫ່ງຊາດ ກະຊວງອຸດສາຫະກໍາ ແລະ ການຄ້າ ຮ່ວມກັບ ກະຊວງພະລັງງານ ແລະ ບໍ່ແຮ່ ຈັດພິທີ ປະກາດການຈັດຕັ້ງ ກະຊວງອຸດສາຫະກໍາ ແລະ ການຄ້າ (ໃໝ່) ໂດຍການເປັນປະທານ ຂອງ ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານກວດກາສູນກາງພັກ ແລະ ອົງການກວດກາແຫ່ງລັດ, ຮອງຫົວໜ້າຄະນະຮັບຜິດຊອບປັບປຸງກົງຈັກການຈັດຕັ້ງຜູ້ຊີ້ນໍາ-ນໍາພາການໂຮມກະຊວງພະລັງງານ ແລະ ບໍ່ແຮ່ ເຂົ້າກັບ ກະຊວງອຸດສາຫະກໍາ ແລະ ການຄ້າ ເຂົ້າຮ່ວມມີ ທ່ານ ໂພໄຊ ໄຊຍະສອນ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານ ມະໄລທອງ ກົມມະສິດ ກໍາມະການສໍາຮອງສູນກາງພັກ ລັດຖະມົນຕີກະຊວງອຸດສາຫະກໍາ ແລະ ການຄ້າ, ມີການນໍາພັກ-ລັດ, ຄະນະນໍາກະຊວງ, ພະນັກງານຫຼັກ ແຫຼ່ງ ຂອງກະຊວງອຸດສາຫະກໍາ ແລະ ການຄ້າ ແລະ ກະຊວງພະລັງງານ ແລະ ບໍໍ່ແຮ່, ສະພາການຄ້າ ແລະ ອຸດສາຫະກຳແຫ່ງຊາດ, ລັດວິສາຫະກິດ ແລະ ບໍລິສັດ ທີ່ຂຶ້ນກັບ ແລະ ແຂກຖືກເຊີນເຂົ້າຮ່ວມ.

ໂອກາດນີ້ ທ່ານ ມະໄລທອງ ກົມມະສິດ ກໍາມະການສໍາຮອງສູນກາງພັກ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ຜ່ານບົດລາຍງານກ່ຽວກັບການກະກຽມ ແລະ ດໍາເນີນການປັບປຸງກົງຈັກການຈັດຕັ້ງໃນໄລຍະຜ່ານມາ ແລະ ທິດທາງແຜນການ ເຄື່ອນໄຫວໃນຕໍ່ໜ້າ ເພື່ອເຮັດໃຫ້ການເຄື່ອນໄຫວວຽກງານຂອງກະຊວງ ອຸດສາຫະກໍາ ແລະ ການຄ້າ ໃໝ່ ສາມາດເຄື່ອນໄຫວ ຕາມສິດ ແລະ ພາລະບົດບາດ ໃນການປະກອບສ່ວນສ້າງສາ ແລະ ພັດະທນາປະເທດຊາດໃຫ້ມີຄວາມຈະເລີນກ້າວໜ້າຂຶ້ນ.

ໃນພິທີ ທ່ານ ພົນໂທ ຄໍາກິ່ງ ຜຸຍຫຼ້າມະນິວົງ ຮອງລັດຖະມົນຕີ ກະຊວງປ້ອງການຄວາມສະຫງົບ, ຫົວໜ້າກົມໃຫຍ່ຕໍາຫຼວດ, ຕາງໜ້າໜ່ວຍງານຂອງຄະນະຮັບຜິດຊອບປັບປຸງກົງຈັກການຈັດຕັ້ງຂື້ນຜ່ານ ມະຕິ ແລະ ລັດຖະດໍາລັດ ວ່າດ້ວຍ ແຕ່ງຕັ້ງ ທ່ານ ມະໄລທອງ ກົມມະສິດ ເປັນເລຂາຄະນະບໍລິຫານງານພັກ ເປັນລັດຖະມົນຕີ ກະຊວງ ອຄ  ແລະ ມະຕິວ່າດ້ວຍຮັບຮອງເອົາຄະນະບໍລິຫານງານພັກ ກະຊວງ ອຄ ຊຸດໃໝ່ ຈໍານວນ 11 ສະຫາຍຄື: 1. ສະຫາຍ  ມະໄລທອງ ກົມມະສິດ ເປັນເລຂາຄະນະພັກ; 2. ສະຫາຍ  ຈັນສະແຫວງ  ບຸນຍົງ ຮອງເລຂາຄະນະພັກ; 3. ສະຫາຍ ຈັນທະບູນ ສຸກອາລຸນ ກໍາມະການ, ຄະນະປະຈຳພັກ; 4. ສະຫາຍ ມະໂນທອງ ວົງໄຊ ກໍາມະການຄະນະພັກ; 5. ສະຫາຍ ນ ແສງເດືອນ ວົງອິນ ກໍາມະການຄະນະພັກ; 6.ສະຫາຍ ພຸດທະວັນ ນັນທະວົງ ກໍາມະການຄະນະພັກ; 7.ສະຫາຍ ບົວວັນ ວິລະວົງ ກໍາມະການຄະນະພັກ; 8. ສະຫາຍ ໄຊສົມເພັດ ນໍລະສິງ ກໍາມະການຄະນະພັກ; 9.ສະຫາຍ ເພັດສະຫວັນ ລັດຕະນະທົງໄຊ ກໍາມະການຄະນະພັກ; 10. ສະຫາຍ ໄຊຊະນະ ໄຊຍະກອນ ກໍາມະການຄະນະພັກ; 11. ສະຫາຍ ອະພິສິດ ແສງສຸລິວົງ ກໍາມະການຄະນະພັກ.

ພ້ອມກັນນັ້ນ ທ່ານ ຮອງລັດຖະມົນຕີ ກະຊວງປ້ອງກັນຄວາມສະຫງົບ ຍັງໄດຜ່ານແຈ້ງການຂອງຄະນະປັບປຸງກົງຈັກການຈັດຕັ້ງ  ກ່ຽວກັບການຮັບຮອງບຸກຄະລະກອນຂອງ ກະຊວງ ອຄ ຄື: ແຕ່ງຕັ້ງ ທ່ານ ຈັນສະແຫວງ ບຸນຍົງ, ທ່ານ ຈັນທະບູນ ສຸກອາລຸນ ແລະ ທ່ານ ມະໂນ ທອງວົງໄຊ ເປັນຮອງລັດຖະມົນຕີ ອຄ; ແຕ່ງຕັ້ງທ່ານ  ບົວວັນ ວິລະວົງ ເປັນຫົວໜ້າຫ້ອງການກະຊວງ; ທ່ານ ນາງ ແສງເດືອນ ວົງອິນ ເປັນຫົວໜ້າກົມຈັດຕັ້ງ ແລະ ພະນັກງານ; ທ່ານ ພຸດທະວັນ ນັນທະວົງ ເປັນຫົວໜ້າກົມກວດກາ; ທ່ານ ນາງ ສັນຕິສຸກ  ພິມພະຈັນ ເປັນຫົວໜ້າກົມນະໂຍບາຍ, ແຜນພັດທະນາ ແລະ ປະເມີນຜົນ; ທ່ານ ປອ ບຸນເພັງ ສີບຸນເຮືອງ ເປັນຫົວໜ້າກົມອຸດສາຫະກຳປຸງແຕ່ງ; ທ່ານ ເພັດສະຫວັນ ລັດຕະນະທົງໄຊ ເປັນຫົວໜ້າກົມພະລັງງານ; ທ່ານ ບຸນຍົງ ສີດາວົງ ເປັນຫົວໜ້າ ກົມທໍລະນີສາດ ແລະ ບໍ່ແຮ່; ທ່ານ ໄຊຊະນະ ໄຊຍະກອນ ເປັນຫົວໜ້າກົມເຈລະຈາ ແລະ ຮ່ວມມືສາກົນ; ທ່ານ ສັນຕິສຸກ ພູນສະຫວັດ ເປັນຫົວໜ້າ ກົມການຄ້າພາຍໃນ; ທ່ານ ນາງ ກິ່ງສະດອນ ເພັດດາວເຮືອງ ເປັນຫົວໜ້າກົມການຄ້າຕ່າງປະເທດ; ທ່ານ ໄຊສົມເພັດ ນໍລະສິງ ເປັນຫົວໜ້າກົມຄຸ້ມຄອງຊັບສິນທາງປັນຍາ; ທ່ານ ສີສັງຄົມ ໂຄດໂຍທາ ເປັນຫົວໜ້າກົມມາດຕະຖານ ແລະ ວັດແທກ; ທ່ານ ອະພິສິດ ແສງສຸລິວົງ ເປັນຫົວໜ້າກົມຄຸ້ມຄອງວິສາຫະກິດ; ທ່ານ ນາງ ມະນີວອນ ວົງໄຊ ເປັນຫົວໜ້າກົມສົ່ງເສີມວິສາຫະກກິດ ວິສາຫະກິດຂະໜາດນ້ອຍ ແລະ ກາງ; ແລະ ທ່ານ ອະນຸສັກ ພົງສະຫວັດ ເປັນຫົວໜ້າ ສະຖາບັນອຸດສາຫະກໍາ ແລະ ພະລັງານ.

ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານກວດກາສູນກາງພັກ ແລະ ອົງການກວດກາແຫ່ງລັດ, ຮອງຫົວໜ້າຄະນະຮັບຜິດຊອບປັບປຸງກົງຈັກການຈັດຕັ້ງຜູ້ຊີ້ນໍາ-ນໍາພາການໂຮມກະຊວງພະລັງງານ ແລະ ບໍ່ແຮ່ ເຂົ້າກັບກະຊວງອຸດສາຫະກໍາ ແລະ ການຄ້າ ໃຫ້ກຽດມີຄໍາເຫັນໂອລົມ ໃຫ້ທິດຊີ້ນໍາ ໃນການຈັດຕັ້ງປະຕິບັດໜ້າທີ່ການເມືອງຂອງສະມາຊິກພັກ-ພະນັກງານຂອງກະຊວງ ອຄ, ພ້ອມນັ້ນທ່ານໄດ້ຍົກໃຫ້ເຫັນສະພາບການປ່ຽນແປງໃໝ່ຂອງພາກພື້ນ ແລະ ສາກົນທີ່ມີຜົນກະທົບຕໍ່ເສດຖະກິດຂອງໂລກ ແລະ ພາຍໃນ ສປປລາວຂອງພວກເຮົາ ສະນັ້ນ ພັກ – ລັດຖະບານຈຶ່ງມີທິດໃນການປັບປຸງ ກົງຈັກການຈັດຕັ້ງ ໃຫ້ ກະທັດຮັດ  ສາມາດເຄື່ອນໄຫວ ໃຫ້ມີຄວາມໂລ່ງລ່ຽນ ມີປະສິດທິພາບ ສາມາດນໍາໃຊ້ຊັບພະຍາກອນ ບຸກຄົນ, ຊັບສິນເງິນຄໍາ ຂອງລັດໃຫ້ເກີດປະໂຫຍດສູງສຸດ  ສາມາດປະຢັດ ຮັບປະກັນຄວາມໂປ່ງໃສ ສາມາດເອື້ອອໍານວຍໃຫ້ການພັດທະນາ  ແລະ ກາຍເປັນແຮງດຶງດູດ ນັກລົງທຶນຕ່າງປະເທດ ໃຫ້ນັບມື້ນັບຫຼາຍຂຶ້ນ. ພ້ອມດຽວກັນນັ້ນ ທ່ານ ຍັງເນັ້ນໃຫ້ ສະມາຊິກພະນັກງານ ໃຫ້ມີຄວາມອຸ່ນອ່ຽງທຸ່ນທ່ຽງ ຕໍ່ແນວທາງການປ່ຽນແປງໃນໄລຍະໃໝ່ ຂອງພັກ – ລັດຖະບານ ເພື່ອນໍາພາປະເທດໃຫ້ມີຄວາມຈະເລີນຮຸງເຮືອງຂຶ້ນເທື່ອລະກ້າວ.

ໃນຕອນທ້າຍ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ (ຜູ້ໃໝ່)ຂື້ນຮັບໜ້າທີ່ ແລະ ຮັບຄໍາໂອວາດ ເຊິ່ງທ່ານ ເນັ້ນໜັກໃນການປະຕິບັດໜ້າທີ່ການເມືອງ ໃນໄລຍະໃໝ່ ຈະພ້ອມກັບຄະນະບໍລິຫານງານພັກ, ຄະນະນໍາ, ສະມາຊິກພັກ,  ພະນັກງານ ພາຍໃນກະຊວງ ອຸດສາຫະກໍາ ແລະ ການຄ້າ ເຊິ່ງຈະພະຍາຍາມສຸດຄວາມສາມາດ ທີ່ພັກ – ລັດຖະບານມອບໝາຍໃຫ້ມີຜົນສໍາເລັດ.

ຂ່າວ:ໄພວັນ ໂຄດວັນທາ

ພາບ: ສູນທອງ ພາວັນ