ໃນວັນທີ 13-14 ກໍລະກົດ 2023 ທີ່ ເມືອງວັງວຽງ, ແຂວງວຽງຈັນ ກົມແຜນການ ແລະ ການຮ່ວມມື ໄດ້ຈັດຝຶກອົບຮົມຫຼັກສູດຕໍ່ເນື່ອງ ກ່ຽວກັບ ການເຊື່ອມສານບົດບາດຍິງ-ຊາຍເຂົ້າໃນຂະແໜງການຄ້າ. ພາຍໃຕ້ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ – LCT . ໂດຍການເປັນປະທານຂອງທ່ານ ແສງພະນົມຈອນ ອິນທະສານ ແລະ ພ້ອມດ້ວຍປະທານຮ່ວມທ່ານ ນາງ ສົມໝາຍ ພົມມຸນິວົງ, ປະທານຄະນະບໍລິຫານງານສະຫະພັນແມ່ຍິງກະຊວງອຸດສາຫະກຳ ແລະ ການຄ້າ, ຮອງຫົວໜ້າກົມຈັດຕັ້ງ ແລະ ພະນັກງານ ແລະ ຕາງໜ້າຈາກກົມອ້ອມຂ້າງກະຊວງ ອຄ ແລະ ບັນດາພາກສ່ວນທີ່ປະຕິບັດໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ – LCT ກໍ່ໄດ້ເຂົ້າຮ່ວມ.
ເຊິ່ງຈຸດປະສົງຂອງ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ – LCT ມີເປົ້າໝາຍພັດທະນາປັບປຸງລະບຽບການທີ່ຕິດພັນກັບທຸລະກິດໃຫ້ງ່າຍຂຶ້ນ, ອຳນວຍຄວາມສະດວກດ້ານການຄ້າ ແລະ ປັບປຸງຄວາມສາມາດໃນການແຂ່ງຂັນຂອງຫົວໜ່ວຍທຸລະກິດ. ປີ 2020 ໂຄງການໄດ້ສ້າງເແຜນປະຕິບັດງານວ່າດ້ວຍການສົ່ງເສີມຄວາມສະເໝີພາບຍິງ-ຊາຍ ສຳລັບໂຄງ ການເພື່ອແນ່ໃສ່ແກ້ໄຂສິ່ງທ້າທາຍໃຫ້ແກ່ຜູ້ປະກອບການຍິງ ແລະ ສົ່ງເສີມຄວາມສະເໝີພາບຍິງ-ຊາຍ ເຊີ່ງເປັນແຜນງານທີ່ເປັນວຽກບູລິມະສິດທີ່ຄູ່ຮ່ວມພັດທະນາສຸມໃສ່ ແລະ ໃຫ້ຄວາມສຳຄັນໃນການຈັດຕັ້ງປະຕິບັດພາຍໃຕ້ໂຄງການໃນປະຈຸບັນ ແລະ ໃນຕໍ່ໜ້າ.
ເພື່ອສຶບຕໍ່ຈັດຕັ້ງປະຕິບັດແຜນງານດັ່ງກ່າວ ກົມແຜນການ ແລະ ຮ່ວມມື, ກະຊວງອຸດສາຫະກຳ ແລະ ການຄ້າ ໄດ້ຈັດຈ້າງຊ່ຽວຊານພາຍໃນ ແລະ ຕ່າງປະເທດ ເພື່ອມາປະເມີນຂີດຄວາມສາມາດຂອງພາກສ່ວນປະຕິບັດໂຄງການໃນການເຊື່ອມສານບົດບາດຍິງ-ຊາຍ ແລະ ອອກແບບເປັນຫຼັກສູດຝຶກກອົບຮົມແບບຕໍ່ເນື່ອງ ກ່ຽວກັບ ການເຊື່ອມສານວຽກງານບົດບາດຍິງ-ຊາຍເຂົ້າໃນຂະແໜງການຄ້າ ເຊີ່ງມີແຜນຈະເລີ່ມຈັດຝຶກອົບຮົມໃຫ້ແກ່ບັນດາກົມອ້ອມຂ້າງກະຊວງ ອຄ ແລະ ພາກສ່ວນປະຕິບັດໂຄງການແຕ່ເດືອນກໍລະກົດ 2023 ຫາ ເດືອນ ກຸມພາ 2024.
ການຝຶກອົບຮົມຄັ້ງທີ 01 ນີ້ແມ່ນເພື່ອສະໜອງຄວາມຮູ້ກ່ຽວກັບນິ ຍາມຂອງບົດບາດຍິງ-ຊາຍ, ຄວາມສະເໝີພາບຍິງ-ຊາຍ, ການສ້າງຄວາມເຂັ້ມແຂງດ້ານເສດຖະກິດແກ່ແມ່ຍິງ ແລະ ນິຍາມຂອງການເຊື່ອມບົດບາຍິງ-ຊາຍ. ເຊີ່ງຫຼັກສູດຝຶກອົບຮົມ ໄດ້ແບ່ງອອກເປັນ 4 ຄັ້ງ 01) ນິຍາມຂອງບົດບາດຍິງ-ຊາຍ ແລະ ການເຊື່ອມສານບົດບາດຍິງ-ຊາຍ. 02) ການເຊື່ອມສານບົດບາດຍິງ-ຊາຍເຂົ້າໃນຂະແໜງທຸລະກິດ. 03) ການເຊື່ອມສານບົດບາດຍິງ-ຊາຍເຂົ້າໃນນະໂຍບາຍການຄ້າ. ແລະ ຄັ້ງທີ 04) ເຄື່ອງມືໃນການເຊື່ອມສານບົດບາດຍິງ-ຊາຍ.
ພາບ ແລະ ຂ່າວ ໂດຍ: ນ. ເພັດປະກາຍ
ສູນສະຖິຕິ ແລະ ຂໍ້ມູນຂ່າວສານ, ກົມແຜນການ ແລະ ການຮ່ວມມື
