ໃນວັນທີ 3 ກໍລະກົດ 2023 ທີ່ສະຖາບັນອຸດສາຫະກໍາ ແລະ ການຄ້າ ໄດ້ເປີດກອງປະຊຸມຄົບຄະນະກາງສະໄໝ ຂອງໜ່ວຍພັກຮາກຖານສະຖາບັນອຸດສາຫະກໍາ ແລະ ການຄ້າ ໂດຍການເປັນປະທານຮ່ວມຂອງ ສະຫາຍ ພຸດທະວັນ ນັນທະວົງ ຄະນະປະຈໍາພັກກະຊວງ ອຄ ແລະ ສະຫາຍ ປອ ແກ້ວມໍລະກົດ ສິດລາກອນ ເລຂາໜ່ວຍພັກຮາກຖານສະຖາອຸດສາຫະກໍາ ແລະ ການຄ້າ, ມີບັນດາສະຫາຍຄະນະໜ່ວຍພັກ, ຄະນະຮັບຜິດຊອບລົງຕິດຕາມ ຂອງກະຊວງ ແລະ ສະມາຊິກພັກສົມບູນພາຍໃນໜ່ວຍເຂົ້າຮ່ວມ.
ສະຫາຍ ປອ ແກ້ວມໍລະກົດ ສິດລາກອນ ເລຂາໜ່ວຍພັກ ໄດ້ກ່າວເປີດກອງປະຊຸມວ່າ: ໃນທ່າມກາງບັນຍາກາດທີ່ທົ່ວພັກທົ່ວກອງທັບ ແລະ ປວງຊົນລາວທັງຊາດ ພວມອອກແຮງແຂ່ງຂັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ແລະ ພວມເລັ່ງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ອຄ ກໍຄືມະຕິກອງປະ ຊຸມໃຫຍ່ ຄັ້ງທີ VI ຂອງໜ່ວຍພັກຮາກຖານ ສອຄ ໃນໄລຍະຜ່ານມາ ແລະ ພ້ອມກັນກໍານົດທິດທາງແຜນການໃນຕໍ່ໜ້າ ສູ້ລວງເລິງ.
ໃນກອງປະຊຸມ ຄັ້ງນີ້ ບັນດາສະມາຊິກພັກສົມບູນ ຈະໄດ້ຮັບຟັງການເຜີຍເເຜ່ເຊື່ອມຊຶມ 3 ເອກະສານສໍາຄັນ ຂອງຄະນະເລຂາທິການສູນກາງພັກຄື: 1. ເຜີຍແຜ່ເຊື່ອມຊືມຄໍາສັ່ງຂອງຄະນເລຂາທິການສູນກາງພັກ ເລກທີ 268/ຄລສພ, ລົງວັນທີ 20/01/2023; 2. ມະຕິຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ ເລກທີ 030/ກມສພ; ແລະ 3. ກົດລະບຽບພັກ ສະໄໝທີ XI, ຄືໜ້າທີ່ ແລະ ສິດ ຂອງຄະນະໜ່ວຍພັກຮາກຖານ ແລະ ຂໍ້ຫ້າມສະມາຊິກພັກ
ຜູ້ແທນໄດ້ພ້ອມກັນປະກອບຄໍາເຫັນ ແລະ ຜ່ານຮ່າງບົດສະຫຼຸບການຕີລາຄາຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງໜ່ວຍພັກ ສອຄ (ກາງສະໄໝ) ແລະ ທິດທາງແຜນການໃນຕໍ່ໜ້າ; ຜ່ານບົດສຳຫຼວດການນໍາພາລວມ ແລະ ບຸກຄົນ ຂອງຄະນະໜ່ວຍພັກ ບັນດາສະມາຊິກພັກສົມບູນ ໄດ້ໃຊ້ສິດປະຊາທິປະໄຕຂອງຕົນ ຢ່າງຕັ້ງໜ້າ ເພື່ອປ່ອນບັດທາບທາມຄວາມເຊື່ອໝັ້ນ-ໄວ້ວາງໃຈ ຂອງການນໍາພາລວມ ແລະ ບຸກຄົນ ໃນຄະນະໜ່ວຍພັກ ເພື່ອເປັນຂໍ້ມູນພື້ນຖານສໍາຄັນໃນການເບິ່ງບັນຫາການຈັດຕັ້ງ ກໍຄືໃຫ້ແຕ່ລະສະຫາຍຄະນະໜ່ວຍພັກເປັນບ່ອງອີງ ໃນການປັບປຸງກໍ່ສ້າງຕົນເອງ ເພື່ອສືບຕໍ່ຊີ້ນຳ-ນໍາພາ ຂະບວນການໃນການຈັດຕັ້ງປະຕິບັດ ຕາມມະຕິກອງປະຊຸມຄົບຄະນະກາງສະໄໝ ໃຫ້ບັນລຸຜົນສໍາເລັດຕາມລະດັບຄາດໝາຍ.
ໃນໂອກາດນີ້ ສະຫາຍ ພຸດທະວັນ ນັນທະວົງ ຄະນະປະຈໍາພັກກະຊວງ ອຄ ກໍໄດ້ໂອ້ລົມວ່າ ຕາງໜ້າໃຫ້ຄະນະບໍລິຫານງານພັກກະຊວງ ຕີລາຄາສູງຕໍ່ການຊີ້ນໍາ-ນໍາພາຫຼາຍຢ່າງເປັນຕົ້ນແມ່ນ ການສຶກສາອົບຮົມທາງດ້ານແນວຄິດ ກໍຄືການກໍ່ສ້າງພັກ-ພະນັກງານ ເພື່ອເສີມຂະຫຍາຍມູນເຊື້ອການນໍາພາຂອງຫນ່ວຍພັກຮາກຖານສະຖາບັນອຸດສາຫະກໍາ ແລະ ການຄ້າ ແລະ ຮັບປະກັນຜົນສໍາເລັດຂອງວຽກງານໃນຕໍ່ຫນ້າ ສະຫາຍໄດ້ເນັ້ນຕື່ມບາງຈຸດຄື: 1) ສືບຕໍ່ເອົາໃສ່ໃຈທາງດ້ານຫລັກການແບບແຜນວິທີເຮັດວຽກລວມສູນປະຊາທິປະໄຕ; 2) ຄະນະຫນ່ວຍພັກ ແລະ ຄະນະນໍາສະຖາບັນຈົ່ງສືບຕໍ່ເອົາໃຈໃສ່ຊີ້ນໍາ-ນໍາພາສະມາຊິກ ແລະ ພະນັກງານທາງດ້ານການເມືອງແນວຄິດ.; 3) ກໍ່ສ້າງສະມາຊິກພັກ ແລະ ພະນັກງານໃຫ້ເປັນລະບົບ ມີລັກສະນະສືບທອດເພື່ອຮັບປະກັນຄວາມຕໍ່ເນື່ອງຂອງວຽກງານ; 4) ຜັນຂະຫຍາຍແນວທາງນະໂຍບາຍ ແລະ ແຜນຍຸດທະສາດຂອງກະຊວງໃຫ້ເປັນແຜນວຽກບູລິມະສິດ; 5) ສືບຕໍ່ເອົາໃຈໃສ່ຂະຫຍາຍການຮ່ວມມືກັບບັນດາສະຖາບັນຄົ້ນຄວ້າ ແລະ ສະຖາບັນການສຶກສາຕ່າງໆທັງພາຍໃນ ແລະ ຕ່າງປະເທດ; 6) ສືບຕໍ່ສ້າງໃຫ້ສະຖາບັນກາຍເປັນສູນກາງຝຶກອົບຮົມເພື່ອຍົກລະດັບຄວາມຮູ້, ວິຊາການຂະແຫນງອຸດສາຫະກໍາ ແລະ ການຄ້າ ທັງໄລຍະສັ້ນ ແລະ ໄລຍະຍາວ ແລະ ສ້າງໃຫ້ເປັນສູນລວມຂອງການຈັດປະຊຸມ ແລະ ສໍາມະນາດ້ານວິຊາການຂອງຂະແຫນງອຸດສາຫະກໍາ ແລະ ການຄ້າ; ແລະ 7) ພັດທະນາຄຸນນະພາບການຮຽນ-ການສອນຂອງວິທະຍາໄລການຄ້າ ໃຫ້ກ້າວສູ່ສາກົນເທື່ອລະກ້າວ ເພື່ອໃຫ້ນັກຮຽນທີ່ຮຽນຈົບສາມາດໄປປະກອບອາຊີບຕ່າງໆ ຫລື ກາຍເປັນຜູ້ປະກອບກິດຈະການໃຫມ່ທີ່ມີຄວາມຮູ້-ຄວາມສາມາດຕາມເສດຖະກິດຍຸກສະໄຫມ ທີ່ເປັນຍຸກເສດຖະກິດດີຈີຕອນ (Digital economy).
ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
